17-sentabr kuni Tojikistonning So‘g‘d viloyatida joylashgan So‘g‘d garnizonining dala o‘quv markazida ikki davlat maxsus bo‘linmalarining hamkorlikdagi aksilteror taktik o‘quvlarining ochilish marosimi bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Unda Tojikiston mudofaa vazirining birinchi o‘rinbosari – bosh shtab boshlig‘i general-leytenant Emomali Sobirzoda, vazirlik va boshqa kuch tuzilmalari qo‘mondonliklari vakillari hamda O‘zbekiston Mudofaa vazirligi harbiy xizmatchilari ishtirok etdi.
Tadbir davomida so‘zga chiqqanlar tomonidan ikki davlat o‘rtasida ilk marotaba o‘zaro harbiy sohada bunday yaqin hamkorlikning o‘rnatilishi Markaziy Osiyo mintaqasidagi xavfsizlik va barqarorlikni ta’minlashda muhim ahamiyat kasb etishi alohida ta’kidlab o‘tildi.
Rasmiy marosim yakunlangach, harbiy xizmatchilar uchun tojikistonlik estrada yulduzlari tomonidan turli-tuman qo‘shiqlar ijro etildi, bu albatta, yig‘ilganlar kayfiyatiga o‘zgacha ruh bag‘ishladi.
Tantanali tadbirdan so‘ng, general-leytenant Emomali Sobirzoda o‘zbekistonlik harbiy xizmatchilar uchun yaratilgan shart-sharoitlar bilan tanishdi. Shuningdek, O‘zbekiston madaniyati, milliy qadriyatlari, boy tarixi hamda Qurolli Kuchlari salohiyatini o‘zida aks ettirgan ko‘chma ma’naviyat xonasiga tashrif buyurdi.
Mavzuga doir: O‘zbekistonlik harbiylar qo‘shma o‘quv mashg‘ulotlarda ishtirok etish uchun So‘g‘d garnizoniga yetib keldi
Izoh (0)