Toshkentdagi Yakkachinor ko‘chasi nomi Yakub Kolas nomiga o‘zgartirildi

Toshkent shahar hokimligida xalq deputatlari Toshkent shahar Kengashining 40-sessiyasi bo‘lib o‘tdi, deb xabar beradi hokimlik matbuot xizmati.

Unda O‘zbekiston Respublikasi Oliy Majlisi Senati 2018-yil 13-avgustdagi KQ-394–III-sonli qarori ijrosini ta’minlash maqsadida, xalq deputatlari Toshkent shahar Kengashida to‘y-hashamlar, oilaviy tantanalar, ma’raka va marosimlar, marhumlarning xotirasiga bag‘ishlangan tadbirlar o‘tkazilishini tartibga solish masalalari bo‘yicha komissiyasi tuzildi.

Shuningdek, sessiyada xalq deputatlari Toshkent shahar Kengashi tomonidan “Toshkent shahri Mirobod tumanidagi Yakkachinor ko‘chasiga yangi nom berish to‘g‘risida”gi qaror qabul qilindi. Endilikda ushbu ko‘cha buyuk belarus shoiri Yakub Kolas nomi bilan ataladigan bo‘ldi.

Yakub Kolas (1882—1956) yangi belorus adabiyotining asoschilaridan biri, jamoat arbobi. 1926-yilda Belarus SSR xalq shoiri, 1928-yilda Belarus SSR fanlar akademiyasining akademigi, 1944-yilda Belarus SSR faxriy olimi unvonlari bilan taqdirlangan.

Sessiya ishida Hindiston-O‘zbekiston davlatlarining o‘zaro hamdo‘stligini mustahkamlash, Toshkent shahri aholisi va ma’muriyati oldidagi siyosat, fan, madaniyat, sport, yoshlarni tarbiyalash va rivojlantirish, Toshkent va Dehli shaharlari do‘stligini rivojlantirish borasida yuksak xizmatlarini inobatga olib, Hindiston-O‘zbekiston do‘stlik jamiyati raisi Anil Kumar Shastriga “Toshkent shahar faxriy fuqarosi” unvonini berish to‘g‘risidagi qaror tasdiqlandi.

Shu bilan birga, ayrim deputatlarning vakolatlari muddatidan ilgari tugatish to‘g‘risida qaror qabul qilindi. Xalq deputatlari Toshkent shahar Kengashi tomonidan bo‘shab qolgan saylov okruglar uchun deputatlar saylovi 2018-yil 14-oktabr, yakshanba kuni qilib belgilandi.