Buxoro viloyati G‘ijduvon tumanida atrof-muhitni muhofaza qilish, tabiiy resurslardan, shu jumladan ichimlik suvdan oqilona foydalanish, suv muhofaza zonalari tartibiga rioya etishni ta’minlash, mazkur sohada yuridik va jismoniy shaxslarning mas’uliyatini oshirishga qaratilgan qonunchilikni takomillashtirish masalalari muhokamasiga bag‘ishlangan tadbir tashkil etildi. Bu haqda Oliy Majlis Qonunchilik palatasi matbuot xizmati xabar bermoqda.
Unda ta’kidlanganidek, amaldagi qonunchilikda ruxsat etilmagan joylarga chiqindilarni tashlaganlik uchun shaxslarni javobgarlikka tortish mexanizmi mavjud emas. 2018-yil 1-iyun holatiga ko‘ra, chiqindilarni belgilanmagan joylarga noqonuniy tashlash bo‘yicha 13,1 mingta (2017-yilda – 6,3 mingta) holat aniqlangan. Ma’muriy javobgarlik to‘g‘risidagi kodeksga ruxsat etilmagan joylarga qattiq maishiy va qurilish chiqindilarni tashlash, suyuq chiqindilarni to‘kkanlik uchun javobgarlikni oshirishni nazarda tutuvchi norma kiritish rejalashtirilmoqda
Qirg‘oq bo‘yida joylashgan, o‘zboshimchalik bilan qurilgan obyekt va inshootlardan daryo va soy o‘zanlariga maishiy va boshqa chiqindilar, shu jumladan oqova suvlar tashlanmoqda. Buning oqibatida, bevosita inson hayoti va sog‘lig‘iga, atrof-muhitga xavf tug‘ilmoqda. O‘rganishlar shuni ko‘rsatmoqdaki, birgina G‘ijduvon tumanidan oqib o‘tuvchi Permas, Qalqonro‘d kanallari va Mavlaniyon kollektorlari suv muhofaza zonalarida aholi va tashkilotlar tomonidan 50 dan ortiq uy-joy, ovqatlanish, xizmat ko‘rsatish va boshqa obyektlar bunyod etilgan.
Tadbirda suv muhofaza zonalarida bu kabi noqonuniy qurilmalar qurilishining oldini olish, aholi o‘rtasida keng tushuntirish ishlarini amalga oshirish suv resurslari muhofaza qilishga, hududlarda sanitar holatni yanada yaxshilashga xizmat qilishi ta’kidlandi.
Tadbirda, shuningdek, aholini toza ichimlik suv bilan ta’minlash, yuridik va jismoniy shaxslar tomonidan undan tejamkorlik bilan foydalanish masalalari muhokama etildi.
Izoh (0)