O‘zbek uzumi Ukraina bozorida raqobatga dosh bera olmayapti

EastFood tahlil kompaniyasi mutaxassislari importchilar va supermarketlar tarmoqlari vakillari bilan suhbatlashib, O‘zbekistondan keltirilayotgan mahsulotlar, xususan, yeyiladigan uzum va o‘rik, shuningdek, poliz ekinlari Ukraina bozorida kelajakda qanchalik raqobatbardosh bo‘lishi mumkinligini aniqladi, deb yozadi “Podrobno.uz”.

Natijalar ikki xil bo‘lib chiqdi. Bir tomondan, asosan katta avlod vakillari o‘zbek mevalarining mazasini yuqori baholab, ular uchun baland narx to‘lashga tayyor ekan.

Ikkinchi tomondan, 35 yoshdan kichik bo‘lgan faol xaridor o‘zbek mevalaridan bexabar bo‘lib, qimmatroq o‘zbek mevalaridan ko‘ra, arzonroq va tanishroq variantni afzal ko‘radi.

Supermarketlar tarmoqlari vakillari va importchilar fikricha, o‘zbek mevalarining eng katta kamchiligi juda murakkab, qimmatbaho va uzun logistika hisoblanadi, bu esa mahsulot narxini oshirib yuboradi.

Masalan, sentabr boshida Ukraina bozorida o‘zbek uzumi 1 kilogrammi uchun 4,3 dollardan sotilgan, ukrain uzumu esa — 1,2—1,6 dollardan.