“Davyergeodezkadastr” qo‘mitasi “Mulkdorlar reyestri”ni test rejimida ishga tushirdi

Test rejimida Geoinfocom davlat unitar korxonasi tomonidan ishlab chiqilgan “Mulkdorlar reyestri” – davreestr.uz, gosreestr.uz ishga tushirildi. Bu haqda “Davyergeodezkadastr” qo‘mitasi Axborot xizmati “Daryo”ga xabar berdi.

O‘zbekiston Respublikasi Prezidentining 2018-yil 13-iyuldagi “Jahon banki va xalqaro moliya korporatsiyasining ‘Biznes yuritish’ yillik hisobotida O‘zbekiston Respublikasining reytingini yanada yaxshilash chora-tadbirlari to‘g‘risida”gi qarori ijrosini ta’minlash maqsadida test rejimida Geoinfocom davlat unitar korxonasi tomonidan ishlab chiqilgan “Mulkdorlar reyestri” – davreestr.uz, gosreestr.uz ishga tushirildi.

Ta’kidlanishicha, ushbu qarorga asosan tuzilgan “Yo‘l xaritasi”da O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi tomonidan amalga oshiriladigan vazifalar ham belgilangan bo‘lib, ayni paytda qo‘mita tomonidan tizimli ishlar olib borilmoqda.

Xabarda aytilishicha, so‘nggi yillarda mamlakatda biznes yuritish uchun qulay ishbilarmonlik muhitini yaratish, tadbirkorlik subyektlarining huquqlari kafolatlarini mustahkamlash, korporativ boshqaruvni rivojlantirish, chet el investitsiyalarini faol jalb etish va investorlarni har tomonlama qo‘llab-quvvatlashni ta’minlashga qaratilgan keng qamrovli islohotlar amalga oshirilmoqda.

Ishbilarmonlik muhitini yaxshilash bo‘yicha ko‘rilayotgan chora-tadbirlarning ko‘lami va samaradorligi nafaqat mamlakatdagi investitsion faollikning ortishi bilan, balki nufuzli xalqaro moliyaviy tashkilotlar va reyting agentliklari tomonidan berilayotgan munosib baho bilan ham o‘z isbotini topmoqda.

Xususan, so‘nggi 5 yil davomida Jahon banki va Xalqaro moliya korporatsiyasining “Biznes yuritish” yillik hisobotida O‘zbekiston Respublikasining reytingi 2 baravardan ortiq yaxshilanib, mamlakat jahonning 190 ta mamlakati orasida 2012-yildagi 166-o‘rindan 2017-yilda 74-o‘ringa ko‘tarildi. Bundan tashqari, so‘nggi hisobotda mamlakat biznes yuritish uchun eng qulay ishbilarmonlik muhitini yaratish ko‘rsatkichi bo‘yicha islohotchi mamlakatlarning birinchi o‘ntaligidan joy oldi.