O‘zbekiston Respublikasi Mustaqilligining 27 yilligi nishonlanayotgan kunlarda suyultirilgan gaz uchun mo‘ljallangan kompozit ballonlarni ishlab chiqaradigan yangi UNG ECCONN mas’uliyati cheklangan jamiyati qo‘shma korxonasi ishga tushirildi. Bu haqda “O‘zbekneftgaz” AJ matbuot xizmati xabar berdi.
Qo‘shma korxona ta’sischilari hisoblanmish “O‘zbekneftgaz” aksiyadorlik jamiyati tarkibiga kiruvchi “Neftgazinvest” mas’uliyati cheklangan jamiyati va Koreyaning Hyundai International Co.Ltd. ushbu loyihada teng ulushga ega.
Loyiha qiymati jami 5,3 million AQSh dollarini tashkil qilib, shulardan 2,2 millioni qurilish va montaj ishlariga sarflandi. Uskuna va jihozlar esa 3,05 million AQSh dollariga xarid qilindi.
Birinchi bosqichda yiliga 60 ming dona ECONN 20 kompozit ballonni ishlab chiqarish rejalashtirilgan. Ikkinchi bosqichda esa ushbu ko‘rsatkich ikki barobarga ortadi.
Qo‘shma korxona Toshkent viloyatidagi Angren EIZ hududida joylashgan bo‘lib, uch gektar maydonni egallagan.
Belgilangan ishlab chiqarishni mahalliylashtirish darajasi 77% va xarajatlarni to‘la qoplash muddati ikki yil.
Suyultirilgan gaz uchun mo‘ljallangan kompozit ballonlarning mahalliy ishlab chiqarilishini yo‘lga qo‘yish bozor talabiga bo‘lgan javobdir. Mazkur ballonlar nafaqat O‘zbekiston aholisining maishiy gaz ballonlarga bo‘lgan ehtiyojini qondirish uchun, balki mamlakatning eksport salohiyatini yanada rivojlantirishda muhimdir.
Tahlilchilar tasdiqlaganidek, MDH bozorining ushbu mahsulotga bo‘lgan talabi 30 million ballondan ortiq. Shu bilan birga, hozirda ishlatilayotgan ballonlarning 60% eskirgan ekanligini inobatga olish zarur.
ECONN 20 kompozit ballonlar zamonaviy yuqori texnologik mahsulot bo‘lib, integratsiyalashgan himoya tizimi evaziga yangi darajadagi xavfsizlik bilan ta’minlangan. Ballonlar ushbu turdagi mahsulotlarga xos bo‘lgan “inson omili” degan muammoli joylarni bartaraf etish inobati bilan ishlab chiqarilgan.
ECONN 20 ballonlarni qo‘llash ko‘lami ancha keng – gaz plitalari, gaz gorelkalari, gaz isitgichlari, gril uchun va boshqalar. Shuningdek, bu kabi ballonlar tom yopish bilan shug‘ullanadigan ishchilar uchun quvvat manbai sifatida ishlatilishi mumkin.
UNG ECCONN mas’uliyati cheklangan jamiyati qo‘shma korxonasi 50 litr hajmga ega 20 kilogrammlik ballonlarni ishlab chiqarishni yo‘lga qo‘ydi. Ushbu ballonlar ishlaydigan harorat oralig‘i Selsiy bo‘yicha -40 dan +80°C gacha.
Xizmat qilish muddati esa 10 yil.
Kompozit ballon metall ballondan 60% ga yengilroq, korroziyaga uchramaydi va ekologik toza mahsulotdir.
Metall ballonlardan farqli o‘laroq, mazkur shisha-polimer ballonlarga xavfsizlik qopqog‘ini o‘rnatish zaruriyati yo‘q, chunki, birinchidan, ular o‘n barobarlik chidamlilik darajasiga ega (metal ballonlarda ushbu ko‘rsatkich 3 – 5 darajani tashkil qiladi) va, ikkinchidan, kompozit materiallar xususiyati va noyob dizayni evaziga portlashdan himoyalangan va mayda bo‘lakchalarga parchalanmaydi.
Izoh (0)