Poytaxtdagi “Turkiston” saroyida O‘zbekiston xalq artistlari Izro Malakov va Muhabbat Shamayeva ishtirokida konsert bo‘lib o‘tdi. Bu haqda O‘zA xabar bermoqda.
Musiqiy dastur oldidan ommaviy axborot vositalari xodimlari uchun uchrashuv tashkil etildi.
Shu kunlarda o‘zbek xalqining suyukli xonandalari Izro Malakov va Muhabbat Shamayeva O‘zbekistonda mehmon bo‘lib turibdi.
“O‘zbekiston – buyuk, to‘rt fasli to‘kis diyor. Butun dunyo ta’lim-tarbiyani O‘zbekistondan o‘rgansa arziydi. O‘zbekiston xalq artisti unvoniga musharraf bo‘lganimda g‘oyat to‘lqinlanib ketdim. Prezident Shavkat Mirziyoyev qisqa vaqt mobaynida xalqning qalbidan o‘rin olgan, uning mehriga sazovor bo‘lgan davlat rahbari sanaladi. O‘zbek xalqining mehnatsevarligi, tantiligi ma’lum va mashhur”, – deydi Izro Malakov.
“O‘zbekistondek yurt dunyoda yo‘q. Samolyotdan tushgan zahotim shu tabarruk diyor tuprog‘ini o‘pdim. Bu aziz yurtning obro‘si yanada yuksalishini tilayman”, – deydi Muhabbat Shamayeva.
“Konsertda Vatan sog‘inchi, yurtdoshlarga mehr-muhabbat, chin insoniy tuyg‘ularni tarannum etuvchi qo‘shiqlar yangradi”, — deyiladi xabarda.
Izoh (0)