Yevropa Ittifoqi AQShdan mustaqil ravishda siyosat yuritishini ma’lum qildi. Bloomberg tomonidan xabar berilishicha, Germaniya va Fransiya AQShning sanksiyalariga qaramasdan, turli xalqaro loyihalarga mablag‘ ajratishga imkon beruvchi moliyaviy mexanizm ustida ish olib bormoqda.
Fransiya iqtisodiyot va moliya vaziri Bruno Le Merning qayd etishicha, Yevropa vassal hudud emas, balki mustaqil qit’a bo‘lishi kerak. Bu esa ayni paytda mavjud bo‘lmagan to‘laligicha mustaqil moliyaviy mexanizm mavjud bo‘lishini anglatadi.
Germaniya tashqi ishlar vaziri Xeyko Maasning ma’lum qilishicha, Yevropa Ittifoqi Eron bilan iqtisodiy aloqalarni himoya qilish va to‘lov kanallarini saqlab qolish ustida ishlamoqda. Uning ta’kidlashicha, SWIFT xalqaro to‘lov tizimlari AQShdan mustaqil qilish rejalashtirilmoqda.
Bunday bayonotlar AQShning Eronga nisbatan sanksiyalarni yangilashiga javoban qilindi. Bir qator Yevropa kompaniyalari o‘z loyihalarini to‘xtatdi yoki investitsion loyihalardan voz kechdi. Bunda Fransiya, Germaniya va uning Ittifoqdagi sheriklari Eron bilan hamkorlikni davom ettirishni talab qilmoqda.
Izoh (0)