Rossiyalik biznesmenlar Putin yordamchisining xati tufayli bir kunda 3 mlrd dollar yo‘qotdi

11 nafar eng badavlat rossiyalik biznesmenlarning boyligi 10-avgust kuni bir kun ichida 3 milliard dollardan ziyodga kamaydi, deb yozadi Meduza Bloomberg reytingiga tayanib.

9-avgust kuni kechqurun Rossiya prezidentining yordamchisi Andrey Belousov Vladimir Putin nomiga yozilgan xatda Rossiyaning metallurgiya va kimyo kompaniyalari daromadlaridan 500 milliard rubl musodara qilishni taklif etgan edi.

Bloomberg hisob-kitoblariga ko‘ra, eng ko‘p “Novolipetsk metallurgiya kombinati” egasi Vladimir Lisin yo‘qotgan — uning davlati 832 million dollarga kamaygan.

Viktor Rashnikov (“Magnitogorsk metallurgiya kombinati”) va Aleksey Mordashov (“Severstal”) 450 million dollardan, Roman Abramovich (Evraz) 381 million dollar, Vladimir Potanin esa (Nornikel) 290 million dollar yo‘qotgan.

Ushbu biznesmenlarga tegishli kompaniyalar “Belousov ro‘yxati”ga kiritilgan.