Parlament quyi palatasidagi Tadbirkorlar va ishbilarmonlar harakati — O‘zbekiston Liberal-demokratik partiyasi va O‘zbekiston “Milliy tiklanish” demokratik partiyasi fraksiyalari yig‘ilishida Davlat budjetining va davlat maqsadli jamg‘armalari budjetlarining 2018-yil birinchi yarim yillik yakunlari bo‘yicha ijrosi to‘g‘risidagi masala muhokama qilindi.
Hisobot davrida davlat budjeti daromadlari o‘tgan yilning mos davriga nisbatan 47,7 foizga o‘sib, belgilangan reja ortig‘i bilan bajarildi, budjet daromadlarining yalpi ichki mahsulotdagi ulushi 21,7 foizni tashkil qildi.
Mamlakatda xizmat ko‘rsatish sohasini rivojlantirish, xususan, zamonaviy xizmat turlarini kengaytirish, turizm salohiyatini oshirish, kichik biznes subyektlari salmog‘ining ortishi hisobiga mikrofirma va kichik korxonalardan davlat budjetiga tushumlar miqdori 1 trillion 109 milliard so‘mni tashkil qilib, 2017-yilning ushbu davriga nisbatan 39,7 foiz o‘sgan.
2018-yilning birinchi yarim yilligi davomida ko‘chmas mulk ob’ektlarini va yer maydonlarini yalpi xatlovdan o‘tkazish natijasida soliq bazasi kengayib, resurs to‘lovlari va mulk solig‘i bo‘yicha davlat budjetiga 5 trilliondan ortiq mablag‘ undirilishiga erishildi.
Shu bilan birga, o‘tgan davrda davlat budjeti mablag‘larining maqsadli ishlatilishida va ularning samaradorligini ta’minlashda hamon xatoliklarga yo‘l qo‘yilganligini ko‘rish mumkin. Bu borada o‘tkazilgan davlat moliyaviy nazorat tadbirlari natijasida 2 ming 275 ta byudjet tashkilotlarining 1 ming 887 tasida moliyaviy xatoliklar, pul mablag‘lari va moddiy boyliklarning kamomadi, o‘zlashtirishlar va noqonuniy xarajatlar aniqlandi. Ayniqsa, bu kamchiliklarni xalq ta’limi, sog‘liqni saqlash, madaniyat ishlari, qishloq va suv xo‘jaligi sohalari, O‘rta maxsus, kasb-hunar ta’limi markazi tizimlarida ko‘rish mumkin.
Yig‘ilishlarda mamlakat iqtisodiyotini rivojlantirish hamda soliq-budjet siyosati sohasidagi, xususan, soliq ma’muriyatchiligini va byudjetlararo munosabatlarni takomillashtirish, mahalliy byudjetlar daromad bazasini mustahkamlash borasida amalga oshirilgan kompleks chora-tadbirlar natijasida 2018-yilning birinchi yarim yilligida davlat byudjeti tasdiqlangan parametrlarga muvofiq amalga oshirilib, 144,3 milliard so‘m yoki yalpi ichki mahsulotga nisbatan 0,1 foiz miqdorida profitsit bilan ijro etilishi ta’minlanganligi qayd etildi.
Izoh (0)