Navoiyda “Eng ulug‘, eng aziz” tanlovi g‘oliblari aniqlandi

Navoiyda “Eng ulug‘, eng aziz” tanlovi g‘oliblari taqdirlandi,deb xabar berdi O‘zbekiston Matbuot va axborot agentligi.

2018-yil 11-avgust kuni Navoiy viloyat Matbuot va axborot boshqarmasi, O‘zbekiston Jurnalistlari ijodiy uyushmasi viloyat bo‘limi, Yozuvchilar uyushmasi viloyat bo‘limi, viloyat teleradiokompaniyasi, “Tasviriy oyina” ijodiy uyushmasi viloyat bo‘limi, viloyat madaniyat boshqarmasi, O‘zbekiston Badiiy akademiyasi viloyat bo‘limi bilan hamkorlikda O‘zbekiston Respublikasining 27 yilligiga bag‘ishlangan “Aziz va yagonamsan, jonajon O‘zbekistonim!” shiori ostida “Eng ulug‘, eng aziz” tanlovining Navoiy viloyati bosqichi g‘oliblarini taqdirlash marosimi bo‘lib o‘tdi.

“Bosma OAV xodimlarining maqolalari”, “Televideniye va radio ijodkorlarining materiallari”, “Yozuvchi va shoirlarning badiiy asarlari”, “Tasviriy san’at, foto asarlari va dizayn ishlari” kabi  nominatsiyalar bo‘yicha 60 dan ortiq mualliflarning jami 150 ta ijodiy ishlari ko‘rib chiqilib, xolis baholandi.

Tantanali taqdirlash marosimida O‘zbekiston Matbuot va axborot agentligi Bosh direktorining birinchi o‘rinbosari S.Shukurov hamda fond direktori S.Yusupov ishtirok etdi.

Tanlov g‘olib va sovrindorlariga Navoiy viloyat matbuot va axborot boshqarmasining diplom va esdalik sovg‘alari topshirildi.