Samarqandda Nyu-Yorkka “aviachiptalar” sotgan firibgar ushlandi

Samarqandda soxta aviakassa ochib, qalbaki aviachiptalarni sotgan firibgar ustidan sud hukmi o‘qildi. Bu haqda “Xalq so‘zi” xabar bermoqda.

Fattoh Anorov (ism-shariflar shartli) bir xonani ijaraga olib, ofisga kirishda “Aviakassa” yozuvli peshlavha o‘rnatadi. Xonaga stol-stul, kompyuter va boshqa zarur jihozlarni joylashtiradi.

Avvaliga firibgar “Toshkent—Tyumen” reysiga har biri 352 dollar evaziga ikkita “aviachipta” sotgan. Shundan so‘ng Nyu-Yorkka uchta “elektron chipta”ni pullagan. Keyin esa Fattoh “Samarqand—Moskva” yo‘nalishiga ikkita, “Toshkent—Istanbul” aviareysiga bitta soxta chipta sotgan. Ularning barchasi aeroportga borgach, chiptalari soxta ekani ma’lum bo‘lgan.

Toshkent aeroportidan Samarqandga qaytganlar avvaliga firibgarni topa olmadi. U “Aviakassa”ni yopib, qorasini ko‘rsatmay ketgandi. Biroq u uzoqqa ketolmadi. Huquqni muhofaza qiluvchi organlar tomonidan qo‘lga olingan Fattoh Anorov barcha qilmishlarini tan oldi.

Sud Fattoh Anorovni 3 yil va 3 oyga ozodlikdan mahrum etdi. Shuningdek, jabrlanuvchilarga yetkazilgan zarar undan undiriladigan bo‘ldi.