So‘nggi 5 yil ichida ilk marta birinchi yarim yillik ko‘rsatkichlari bo‘yicha Rossiya rubli sobiq SSSRning 11 ta valyutasi ichida eng past o‘sish darajasini ko‘rsatdi. Bu haqda Bloomberg’ga tayanib, Spot xabar bermoqda.
AQSh sanksiyalari va pul-kredit siyosatining keskinlashishi oqibatida rubl joriy yilda 8 foizdan ziyodga arzonlashdi. Bu boshqa valyutalar qiymatining pasayishidan ikki barobar ko‘pdir.
“AQShning aprel oyida joriy qilingan sanksiyalari bo‘lmaganida rubl hozirgidan 4 foizga kuchli bo‘lishi mumkin edi”, — deya Rossiya Markaziy banki ma’lumotlariga tayanib, nashr xabar qiladi.
Sobiq SSSRning birdaniga 4 mamlakati valyuta qiymatining o‘sishi bo‘yicha dunyo miqyosida yetakchi o‘ntalikdan joy oldi. Bu Rossiyadan ko‘ra mintaqaning boshqa mamlakatlariga ko‘proq sarmoya kiritilayotganidan darak beradi.
“Sarmoyadorlar uchrashuvlarda o‘z vaqtining yarminigina Rossiya uchun ajratmoqda, qolgan vaqt MDHning boshqa davlatlariga e’tibor qaratilmoqda”, — deydi Moskvadagi “Renessans Kapital” sarmoyadorlik kompaniyasi iqtisodchisi Oleg Kuzmin.
“Qozog‘iston, O‘zbekiston yoki Ozarbayjon sarmoyadorlarning Rossiya aktivlarini kamaytirishga intilishidan foyda ko‘rib qolishi mumkin”, — deya Stokgolmdagi SEB bankining rivojlanayotgan bozorlar bo‘limi bosh strategi Per Xammarlund fikr bildirgan.
Shunga qaramasdan, MDH mamlakatlari bozori Rossiyadan ortda qolishda davom etmoqda. Vaholanki, bu mamlakatlarga kapital kiritish xavfsizroq, foyda olish imkoniyatlari ham ko‘proqdir.
Avvalroq, O‘zbekistonga kiritilayotgan pul mablag‘larining asosiy qismi mehnat muhojirlari tomonidan jo‘natilayotgani, bu jo‘natmalarning 77 foizi Rossiyadan yuborilgani xabar qilingan.
2018-yilning birinchi choragida O‘zbekistonga muhojirlar 1 milliard dollar yuborgan. Taqqoslash uchun mamlakatning gaz sotishdan olgan foydasi bundan 2 barobar kam bo‘lganini aytish mumkin. Eksport hajmi esa 2,9 milliardni tashkil qilgan.
Muhojirlarning pul jo‘natmalari O‘zbekistondagi moliyaviy operatsiyalarning profitsit (mablag‘larning ortishi) hisobini ta’minlab berdi. Bu haqda Markaziy bank xabar qilgan.
Izoh (0)