Samarqand viloyatining Pastdarg‘om tumanida ichki ishlar idoralari xodimlari qo‘shmachilik bilan shug‘ullanayotgan ayolni mijozni qabul qilayotganida qo‘lga oldi. Bu haqda “Zarafshon” xabar bermoqda.
Ayol ikki nafar voyaga yetmagan farzandi borligi, Rossiyada ishlab, Juma shahridan uy olgani, bu yerga kelgach, ish topolmagani, bolalarini bir o‘zi voyaga yetkazayotgani, bor-yo‘g‘i bir martagina qo‘shmachilik bilan shug‘ullanishiga to‘g‘ri kelganini bildirdi.
Ammo ayol istiqomat qiladigan mahallaning xotin-qizlar bilan ishlash va oilalarda ma’naviy-axloqiy qadriyatlarni mustahkamlash bo‘yicha mutaxassisi boshqacha fikrlarni aytdi: “Bir necha bor ogohlantirganmiz. U tibbiyot kollejining hamshiralik yo‘nalishini tugatgan, ammo diplomi bo‘yicha ish topa olmadi. Sababi, o‘tgan yillar davomida Rossiyada mehnat qilgan, endi yana o‘zi ishlagan joyga qaytishi uchun malaka oshirishi kerak”.
Ayol o‘zi aytganiday bir marta shu bilan shug‘ullanganmi yoki mahalla faolining gapiga ko‘ra, bir necha marta uyida “qo‘noq” qabul qilganmi, bunisi noma’lum. Ammo uning ishi sudga oshirildi.
Ayni paytda ayolga Pastdarg‘om tuman hokimligi tomonidan tegishli yordam ko‘rsatilmoqda. Xususan, u tuman tibbiyot birlashmasida ishlashi uchun qayta o‘qitishga jo‘natilib, farzandini bog‘chaga joylashtirish masalasida ko‘mak berilmoqda.
Izoh (0)