Andijon viloyatining Izboskan tumani, Qorayantoq qishlog‘ida “Jajji gulg‘unchalar” nomli 100 o‘ringa mo‘ljallangan xususiy maktabgacha ta’lim muassasasi foydalanishga topshirildi. Bu haqda O‘zA xabar berdi.
Mehnat faxriysi, 75 yoshni qarshilayotgan Mahkamboy ota Bo‘ronov farzandlari bilan 2 milliard so‘mdan ortiq shaxsiy mablag‘i hisobidan barpo etgan ushbu muassasa qishloq bolalari uchun munosib tuhfa bo‘lish bilan birga, ayniqsa, onalarni g‘oyat mamnun qildi.
Ikki qavatli ushbu zamonaviy muassasada bolalarni maktab ta’limiga tayyorlash, ularning intellektual salohiyatini yuksaltirish, har jihatdan yetuk va barkamol voyaga yetishi uchun barcha sharoit yaratilgan. O‘n nafar xodim doimiy ish o‘rni bilan ta’minlandi.
Ma’lumot uchun, joriy yil Izboskan tumanida 15 nodavlat maktabgacha ta’lim muassasasi ishga tushirilishi, bolalarni maktabgacha ta’lim muassasalariga qamrab olish 61,3 foizga yetkazilishi rejalashtirilgan.
Izoh (0)