Toshkent shahar IIBB Jinoyat-qidiruv boshqarmasi xodimlari pora evaziga avtomobil taklif qilgan shaxsni qo‘lga olish boyicha operatsiya o‘tkazdi, deya xabar bermoqda bosh boshqarma matbuot xizmati.
Toshkent shahar IIBB Jinoyat-qidiruv boshqarmasi Iqtisodiy xavfsizlik va korrupsiyaga qarshi kurashish bo‘limi xodimlari tomonidan qo‘lga kiritilgan ma‘lumotga ko‘ra, Toshkent shahrida istiqomat qiluvchi ikki shaxs Nexia-3 rusumli avtomobilni 3 ming dollar ustama haqi evaziga xaridorga qisqa muddatda yetkazib berishni taklif qilgani ma’lum bo‘lgan.
“Ulardan biri bevosita shu sohaga aloqador shaxs ekanligi aniqlangan”, — deyiladi IIBB axborotida.
Olib borilgan tezkor tadbir natijasida talab qilingan summani olayotgan vaqtda ijtimoiy fondlardan birining ishchisi, 63 yoshli fuqaro va uning sherigi — “Uzavtotexxizmat” kompaniyasi avtosalonlaridan birining direktori qo‘lga olingan.
Xabar berishlaricha, mazkur holat bo‘yicha Jinoyat kodeksining 168-moddasi 2-qismi (“Firibgarlik”) va 211-moddasi 2-qismi (“Pora berish”) bo‘yicha jinoyat ishi qo‘zg‘atilgan.
Izoh (0)