AQSh O‘zbekiston mustaqilligini tan olgan birinchi davlatlardan hisoblanadi. Ikki mamlakat o‘rtasidagi diplomatik aloqalar 1992-yil 19-fevralda o‘rnatilgan va O‘zbekistonning AQShdagi birinchi elchixonasi 1993-yil fevral oyida ochilgan. Elchixona Vashington shahridagi Massachusets avenyusida joylashgan.
1906—1909-yillarda qurib bitkazilgan ushbu imorat fransuz me’mori Jyul Anri de Sibur tomonidan Lui XV uslubida ishlab chiqilgan bo‘lib, u bu ko‘chada joylashgan eng katta va eng qimmatbaho binolardan hisoblangan.
Uyning interyer qismi XVI—XVIII asrlar fransuz va ingliz bezak elementlarini o‘z ichiga olgan. Bezaklar 20—30 yil saqlangan qizil daraxt bilan ishlangan. Olti qavatli bu binoda 80 dan ortiq xona, 38 ta kamin o‘chog‘i, XVIII asrning noyob kumush qandillar mavjud.
Ichki xonalarning sodda va mantiqiy davom etishi hamda ularning uslubiy o‘zgarishlar ketma-ketligi, bir vaqtning o‘zida ham dizayn, ham hunarmandchilikning yuqori sifatini namoyish etadi. Alohida e’tibor ayniqsa, nozik yog‘och o‘ymakorligiga, gips va temir ishlariga, shuningdek, metalldan ishlangan ajoyib buyumlar va yoritish moslamalariga qaratiladi.
Binodan 1927-yilgacha xususiy turar joy sifatida foydalanilgan bo‘lib, so‘ng u Kanada hukumati tomonidan sotib olingan va vakolatxona, kanselyariya va elchixona sifatida ishlatilgan. O‘zbekiston hukumati mazkur binoni 1996-yilning yozida sotib olgan.
Sotib olingandan so‘ng mazkur binoning ichki qismiga ba’zi o‘zgartirishlar qilingan. Binoda milliylikni mujassam ettirish va elchixonaga tashrif buyuruvchilarga yog‘och o‘ymakorligi, ipak yigirish, shisha bo‘yash va rassomlik kabi Markaziy Osiyo san’atining boy an’analarini namoyish etish maqsadida o‘zbek bezak elementlari ishlatilgan. Jumladan, xonalar interyerida ikat, milliy liboslar, chinni va sopol idishlar kabi milliy san’at namunalari madaniyatlar uyg‘unlashuvini o‘zida aks ettiradi.
Elchixona bu yerga ko‘chib kelgandan boshlab bu joy ko‘p tarixiy uchrashuvlar uchun makon bo‘lgan. Aytib o‘tish joiz, Massachusets ko‘chasida O‘zbekiston bilan bir qatorda boshqa ko‘p mamlakatlarning elchixonalari ham joylashgan va mazkur ko‘cha shaharning eng nufuzli joylaridan hisoblanadi.
Shu kunlarda O‘zbekiston Prezidentining AQShga davlat tashrifiga juda qizg‘in tayyorgarlik ishlari davom etmoqda. Elchixona xodimlari, O‘zbekiston delegatsiyasi vakillari va jurnalistlar shu yerda ish olib bormoqda.