Toshkentda 2—6-may kunlari “Sharq atirguli” bolalar va yoshlar festivali bo‘lib o‘tadi, deb xabar beradi O‘zA.
O‘zbekiston Madaniyat vazirligi tasarrufidagi “Sharq atirguli” bolalar ijod uyi tomonidan qator tashkilotlar bilan hamkorlikda ilk bora xalqaro miqyosda tashkil etilayotgan festival oldidan ommaviy axborot vositalari vakillari uchun matbuot anjumani o‘tkazildi.
O‘zbekiston madaniyati va san’atini xalqaro maydonda keng targ‘ib qilish, ko‘rik-tanlov va festivallarda mamlakat yoshlari ishtirokini kuchaytirish g‘oyat muhimdir, deyiladi xabarda.
Yoshlarni teatr va muzeylarga, konsert-tomosha tadbirlariga tizimli ravishda jalb etish orqali ularning ma’naviy-axloqiy, estetik va madaniy darajasini yanada yuksaltirish kabi katta maqsadlarni o‘z oldiga qo‘ygan xalqaro festivalga qiziqish ancha yuqori. Vokal va raqs kabi yo‘nalishlarda tashkil etilayotgan tanlovda 4 yoshdan 18 gacha va 18 dan 28 yoshgacha bo‘lgan yoshlar o‘z san’atini namoyon qiladi. Tanlovda qator xalqaro festivallar laureatlari, professional ijrochilar bilan bir qatorda yosh, endigina san’at ostonasiga qadam qo‘yayotgan havaskorlar ham ishtirok etadi. Tojikiston, Qozog‘iston, Qirg‘iziston, Hindiston, Rossiya kabi davlatlardan ham ishtirokchilar kelishi kutilmoqda.
“Qatnashchilar mahoratini turli davlatlar san’at vakillaridan iborat hakamlar hay’ati baholab boradi. Ular orasida O‘zbekiston xalq artisti Rushana Sultonova, O‘zbekistonda xizmat ko‘rsatgan artistlar Kumush Razzoqova, Kozim Qayumov, Omina Bobojonova kabi xalq suygan san’atkorlar bor”, — deyiladi xabarda.
Xalqaro festival doirasida ishtirokchilarning O‘zbekistondagi tarixiy shaharlarga sayohati ham rejalashtirilgan.
Izoh (0)