Joriy yilning 19—22-aprel kunlari Jizzax viloyatining Arnasoy tumanida hokimlik, tegishli davlat va jamoat tashkilotlari vakillari va rahbarlari ishtirokida o‘quv-amaliy seminarlar o‘tkazildi. Bu haqda Savdo-sanoat palatasi axborot xizmati xabar berdi.
Seminarda hududlarni ijtimoiy-iqtisodiy rivojlantirish, tumanning iqtisodiy salohiyati va undan samarali foydalanish yo‘nalishlari, tumanda tijorat banklari, kredit tashkilotlari va sug‘urta tashkilotlarining zamonaviy moliyaviy xizmatlarini joriy etish, soliq tizimi va soliq ma’murchiligini isloh qilish hamda budjetga to‘lov intizomini mustahkamlashning ustuvor yo‘nalishlari kabi mavzularda davlat va jamoat tashkilotlari rahbarlari tomonidan taqdimotlar o‘tkazildi.
O‘zbekiston Savdo-sanoat palatasi raisining birinchi o‘rinbosari Islom Jasimov o‘z ma’ruzasida hududda qulay ishbilarmonlik muhitini shakllantirish, tadbirkorlikni jadal rivojlantirish, moddiy va texnik resurslaridan keng foydalanishni kengaytirish hamda iste’mol tovarlari va pullik xizmatlar bilan ta’minlash, tumanda xizmat ko‘rsatish sohasini rivojlantirish, shuningdek, birinchi navbatda xotin-qizlar va yoshlar, shu jumladan, uyushmagan yoshlar hamda nogironligi bo‘lgan shaxslar, kam ta’minlangan oilalar a’zolarining bandligini ta’minlash mexanizmlari haqida to‘xtalib, batafsil ma’lumotlar berdi.
Seminar o‘z ishini 23—25-aprel kunlari Jizzax viloyatining G‘allaorol tumanida davom ettiradi.
Izoh (0)