Mirzo Ulug‘bek Toshkentning eng serdaromad, Yunusobod esa eng serxarajat tumani deb topildi

Moliya vazirligi Toshkent shahri tumanlari tomonidan 2017-yil budjetining bajarilishi haqida ma’lumotlarni e’lon qildi. Bu haqda Spot xabar bermoqda.

Hisobotga ko‘ra, Mirzo Ulug‘bek 2017-yil yakunlariga ko‘ra Toshkentning eng serdaromad tumani bo‘lgan. Tuman daromadi 138,5 milliard so‘mni tashkil etgan — bu poytaxtning barcha tumanlari ichida eng yuqori ko‘rsatkich. O‘z navbatida, xarajat 133,9 milliard so‘mni tashkil qilgan.

Mahalliy budjetni bajarishda eng katta xarajat ko‘rsatkichi Yunusobod tumanida qayd etildi — 145,2 milliard so‘m. Daromad, o‘z navbatida, 128,5 milliard so‘mga teng bo‘ldi.

Eng kichik daromad Bektemir tumaniga to‘g‘ri keldi — 24,4 milliard so‘m (xarajat — 28,7 milliard so‘m).

2017-yili Toshkent shahri mahalliy budjetini bajarishda jami daromad 2,44 trillion so‘mni, xarajat 2,43 trillion so‘mni tashkil etdi.