Shavkat Mirziyoyev va Emomali Rahmon 2020-yilgacha chegaraoldi hududlarida muhandislik to‘siqlari uchastkalarini zararsizlantirish ishlarini yakunlash haqida kelishib oldi. Bu ikki davlat rahbari imzolagan Do‘stlik va ahil qo‘shnichilikni mustahkamlash to‘g‘risidagi qo‘shma bayonotda
ko‘rsatib o‘tilgan.
Foto: AFP“Prezidentlar ikki mamlakatning chegaraoldi hududlarida muhandislik to‘siqlari uchastkalarini zararsizlantirish masalasi bo‘yicha O‘zbekiston—Tojikiston qo‘shma ishchi guruhi tuzilishini mamnuniyat bilan e’tirof etdilar va mazkur ishlarni 2018—2019-yillarda yakunlash lozimligini qayd etdilar”, — deyiladi hujjatda.
Ikki davlat rahbarlari harbiy va harbiy-texnikaviy sohalarda, shuningdek, harbiy ta’lim sohasida o‘zaro manfaatli asoslarda hamkorlikni rivojlantirishga tayyor ekanliklarini tasdiqladi.
Prezidentlar terrorizm va ekstremizm, narkotrafik, transmilliy uyushgan jinoyatchilik, noqonuniy qurol savdosi, ommaviy qirg‘in qurollarini tarqatish, noqonuniy migratsiya hamda boshqa mintaqaviy va xalqaro xavfsizlikka oid xuruj va tahdidlarga qarshi kurashishda ham ikki tomonlama, ham xalqaro formatlarda hamkorlikni mustahkamlashga, shuningdek, o‘z hududlarida tomonlarning milliy xavfsizlik manfaatlariga qarshi qaratilgan noqonuniy faoliyatni amalga oshirishga yo‘l qo‘ymaslikka tayyor ekanliklarini tasdiqladi.
Ushbu maqsadlarda O‘zbekiston va Tojikiston tegishli idoralarining maslahatlashuvlarini o‘tkazish orqali hamkorlikni takomillashtirish bo‘yicha barcha zaruriy choralar ko‘riladi.
Izoh (0)