Madaniyat va sport vazirligidan keyin Jismoniy tarbiya va sport davlat qo‘mitasi nomini olgan tashkilot endi alohida vazirlik maqomiga ega bo‘ldi. Bu haqda MOQ matbuot xizmati xabar berdi.
2018-yilning 14-fevralidan boshlab mazkur tashkilot Jismoniy tarbiya va sport vazirligi bo‘lib o‘zgardi. Bunga qadar O‘zbekiston davlat jismoniy tarbiya institutiga rektor bo‘lgan, keyinroq O‘zbekiston futbol assotsiatsiyasi vitse-prezidenti sifatida tanishtirilgan Shoakram Isroilov, endilikda vazir darajasiga ko‘tarildi. Bundan buyon u Jismoniy tarbiya va sport vazirligi vaziri sifatida faoliyat olib boradi.
Milliy olimpiya qo‘mitasi bosh kotibligidan, tashkilotning birinchi vitse-prezidentligi darajasiga qadar ko‘tarilgan Oybek Qosimov esa vazirning birinchi o‘rinbosari sifatida ishlaydi.
Sport Qo‘mitasiga shu kunga qadar rahbarlik qilib kelgan Rustam Qurbonov o‘z-o‘zidan lavozimdan ozod bo‘ldi. Uning o‘rinbosari sifatida ishlab kelgan Iskandar Jo‘rayev esa Oybek Qosimovning o‘rniga MOQ birinchi vitse-prezidenti etib tayinlandi. Ya’ni, Jo‘rayev MOQ prezidenti Umid Ahmadjonovning birinchi yordamchisi bo‘ldi.
Izoh (0)