Qoraqalpog‘istonning chekka tumanlarida ko‘zi ojizlar uchun maxsus kutubxonalar ochiladi

Qoraqalpog‘iston Respublikasi Madaniyat vazirligi huzuridagi Respublika ko‘zi ojizlar kutubxonasi direktori Alima Axetova kutubxonaning Nukus shahri, To‘rtko‘l, Ellikqal’a, Kegayli tumanlarida filiallari ochilishi to‘g‘risida ma’lumot berdi. Bu haqda O‘zA xabar qilmoqda.

Kutubxonalar tuman markazlaridagi madaniyat va aholi dam olish markazlari binosida faoliyat yuritadi.

Bunday filiallarni tashkil etishdan asosiy maqsad, ko‘zi ojiz insonlar va ular oila a’zolarining bilim olish darajasini oshirish, kutubxona ishini kuchaytirish, kutubxona fondi, o‘quv-uslubiy, badiiy-adabiy, moddiy-texnik bazasini mustahkamlash, shtatlar birligida ko‘rsatilgan tajribali mutaxassislar bilan ta’minlash ishlarini amalga oshirishdan iborat.

Kutubxonalar gapiruvchi, tekis bosmali va Brayl shriftidagi adabiyotlar bilan ta’minlanadi.

Ma’lumot uchun, bu kabi kutubxona filiallari avval Chimboy, Xo‘jayli, Amudaryo, Qo‘ng‘irot, Beruniy tumanlarida ochilgan.