Koreya Respublikasi KXDRdan qochib o‘tganlarni so‘roq qilish muddatini 2 barobar qisqartiradi

Koreya Respublikasi hukumati mamlakatga qochib kirgan KXDR fuqarolarini so‘roq qilishning qonun bilan belgilangan muddatini 180 kundan 90 kunga qisqartiradi. Bu haqda Yonhap News agentligi ma’lum qildi, deb yozadi “TASS”.

Qonunchilikka tegishli tuzatish vazirlar mahkamasi tomonidan 13-fevral, seshanba kuni qabul qilinadi.

Amaldagi jarayonlarga muvofiq, Koreya Respublikasiga qochib kelayotgan fuqarolar yarim yil davomida kontrrazvedkachilar va boshqa xizmatlar vakillari tomonidan so‘roq qilinadi. Ular qochish sabablari va boshqa ma’lumotlarni aniqlaydi.

Tekshirishdan muvaffaqiyatli o‘tgan taqdirda ular Janubiy Koreya pasporti va davlatdan moliyaviy yordam oladi. Oxirgi vaqtlarda KXDRdan Janubga har yili mingga yaqin odam qochib o‘tmoqda. Ularning 70 foizga yaqinini ayollar tashkil etadi.

Koreya Respublikasi hukumati vakillarining aksariyati so‘roq qilish uchun 180 kunni juda uzoq muddat deb hisoblaydi.