Bugun: “Bazel” — “Manchester Siti” va “Yuventus” — “Tottenhem”. Siz qaysi o‘yinni tomosha qilasiz?

Futbol bo‘yicha Yevropa Chempionlar Ligasining nimchorak final bosqichi bugun — 13-fevral kuni rasman start oladi.

Toshkent vaqti bilan 00:45 da APL yetakchisi “Manchester Siti” Shveysariyada “Bazel” mehmoni bo‘ladi. Xuddi shu vaqtda Turinda “Yuventus” hamda “Tottenhem” klublari maydonga chiqib keladi.

“Tottenhem” guruh bosqichida Madridning “Real” va Dortmundning “Borussiya” klublaridan ustunroq bo‘la olgandi. Shuningdek, “shporlar” APLning ketma-ket uch turida markaziy o‘yinda ishtirok etib, muxlislar olqishiga sazovor bo‘ldi. Avvaliga “Yunayted” 2:0 hisobida taslim etilgan bo‘lsa, keyinroq “Liverpul” bilan murosaga rozi bo‘lindi — 2:2. So‘nggi turda esa “Arsenal” mag‘lubiyatga uchratildi — 1:0. “Yuventus” Italiyaning ketma-ket olti karra chempioni hisoblanadi, ayni paytda A seriyada ikkinchi bo‘lib turgan turinliklarning imkoniyatini yuqori baholayotganlar nisbatan ko‘proqni tashkil qilmoqda.

Yevropa Chempionlar Ligasi o‘yinlarini O‘zbekiston hududida namoyish qiluvchi UzReport va Futbol-TV telekanallari bugun har ikki bellashuvni jonli namoyish qilishni rejalashtirgan.

Chempionlar Ligasi 1/8 final 13-fevral, seshanba

“Bazel” — “Manchester Siti” Futbol-TV“Yuventus” — “Tottenhem” UzReport