Futbol bo‘yicha O‘zbekiston milliy terma jamoasi shu yilning mart oyida JCh—2018 ishtirokchisi hisoblangan Senegalga qarshi o‘rtoqlik o‘yinida maydonga tushadi. Bu haqda O‘FA matbuot xizmati ma’lumot berdi.
Uchrashuv 23-mart kuni Kasablanka shahrida bo‘lib o‘tadi. Avvalroq o‘zbekistonliklar mundialning boshqa bir ishtirokchisi Marokash bilan ham kelishuvga erishgan bo‘lib, mazkur o‘yin 27-mart kuni aynan Kasablankada o‘tishi rejalashtirilgandi. Shu tariqa O‘zbekiston milliy termasi 4 kun ichida 2 ta kuchli raqib bilan bellashish imkoniyatiga ega bo‘ldi.
Qayd etilishicha, kelishuv amalga oshishida FIFA prezidenti Janni Infantinoning ham yordami bor. O‘FA prezidenti sifatida faoliyat olib borayotganida Umid Ahmadjonov birinchilardan bo‘lib Infantino bilan ko‘rishgan bo‘lib, o‘zaro hamkorlik borasida kelishuvga erishgandi.
Shu tariqa O‘FA 2018-yil uchun allaqachon 3 ta o‘rtoqlik o‘yini kelishib ulgurdi. Ularning har uchalasi ham Rossiya mundialida ishtirok etadigan mamlakat termalariga qarshi o‘tishi diqqatga sazovor. Bungacha may oyida Tehronda Eron milliy termasiga qarshi o‘rtoqlik o‘yini bo‘lib o‘tishi masalasi ham aniq bo‘lgandi.
Senegal termasi Jahon Chempionatida Polsha, Kolumbiya va Yaponiya bilan raqib bo‘ladi. Marokashga esa Ispaniya, Eron va Portugaliya termalari duch keladi.
Izoh (0)