Apple kompaniyasi barcha iPhone’larda va kompyuterlarda zaiflik borligini tan oldi

Apple korporatsiyasi protsessorlardagi jiddiy zaifliklar iMac va iPhone’ning barcha modellariga tegishli ekanligini tasdiqladi, deb yozadi “RIA Novosti” kompaniya saytidagi bayonotga tayanib.

Avvalroq ekspertlar Intel, AMD va ARM protsessorlarida nuqsonlarni aniqlagan edi, ular tufayli oddiy foydalanuvchilik dasturlari xotiraning himoyalangan qismi tuzilmasini “ko‘ra olishi” va maxfiy axborot saqlanadigan joyni aniqlashi mumkin.

“Mac OS va iOS operatsion tizimli barcha qurilmalarda zaiflik bor, ammo ayni paytda undan foydalanish usullari ma’lum emas. Ushbu nuqsonni suiiste’mol qilish uchun qurilmaga zararkunanda dastur o‘rnatilishi kerak, shu tufayli biz dasturlarni faqat ishonchli manbalardan yuklab olishni tavsiya etamiz”, — deyiladi kompaniya bayonotida.

Bundan tashqari, Apple foydalanuvchilarni ushbu nuqsonlar tufayli yuzaga keladigan ehtimoliy xavflardan operatsion tizimning yangilanmalarini chiqarish orqali himoyalashga va’da berdi.