“Yulduzlar jangi”ning so‘nggi uch filmi jahon kinoprokatida 4 mlrd dollardan ko‘proq pul ishladi

“Yulduzlar jangi” franshizasiga mansub yangi filmlarning jahon prokatidagi umumiy kassa yig‘imlari 4 milliard dollarlik ko‘rsatkichdan oshdi. Bu haqda The Hollywood Reporter xabar bermoqda.

2012-yili The Walt Disney kompaniyasi Lucasfilm studiyasini sotib olish uchun salkam shuncha (4,06 milliard dollar) pul to‘lagan edi.

Shunday qilib, agar filmlarni ishlab chiqarish va ularning reklamasi uchun sarflangan mablag‘larni hisobga olmasa, uchta film (“Yulduzlar jangi: Kuchning uyg‘onishi”, “Qaytmas Birinchi: Yulduzlar jangi hikoyasi” va “Yulduzlar jangi: So‘nggi jedaylar”) bilan Disney’ning xarajatlari qoplandi.

Ayni vaqtda, bunda franshiza bilan bog‘liq suvenir mahsulotlari va mavzuli parklardagi attraksionlarning chipta sotuvlari, shuningdek, boshqa ko‘rsatkichlar bo‘yicha tushgan daromadlar hisobga olinmagan.