O‘zbekiston musulmonlari idorasi tasarrufidagi diniy ta’lim muassasalarida “Qur’oni karim va tajvid” hamda “Arab tili” fanlari bo‘yicha pulli o‘quv kurslari faoliyat boshlashi ortga surildi. Bu haqda idora matbuot xizmati xabar berdi.
“O‘zbekiston musulmonlari idorasining 2017-yil 13-noyabrdagi buyrug‘iga asosan idora tasarrufidagi diniy ta’lim muassasalarida 2017—2018-o‘quv yilining 1-dekabridan boshlab ‘Qur’oni karim va tajvid’ hamda ‘Arab tili’ fanlari bo‘yicha o‘quv kurslari faoliyat boshlashi haqida ma’lum qilingan edi. Mazkur xabar e’lon qilinganidan so‘ng O‘zbekiston musulmonlari idorasiga ko‘plab fuqarolarimiz tomonidan yozma va og‘zaki murojaatlar bo‘ldi. Mutaxassislar tomonidan murojaatlar o‘rganib chiqilib, tashkil etilishi rejalashtirilgan kurslardagi o‘qish muddati, o‘quv rejalari va boshqa me’yoriy hujjatlarni qayta ko‘rib chiqish, ular tasdiqlangach, bu haqda qo‘shimcha e’lon qilish maqsadga muvofiq ekaniga xulosa qilindi”, — deyiladi xabarda.
Kurslarda o‘qish istagida bo‘lgan fuqarolarga O‘zbekiston musulmonlari idorasining www.muslim.uz saytini kuzatib borish tavsiya etildi.
Izoh (0)