Toshkent viloyati bojxona boshqarmasi xodimlari va huquqni muhofaza qiluvchi boshqa idoralar vakillari bilan hamkorlikda “O‘zbekiston” temir yo‘l chegara bojxona postida navbatdagi bojxona qoidabuzarligi holati aniqlandi, deb xabar beradi bojxona qo‘mitasi axborot xizmati.
Samarqand viloyatida istiqomat qiluvchi B.Mamaraimov nomiga Xitoydan keltirilgan 2 ta yuk konteynerida yo‘l-yuk kuzatuv hujjatlariga ko‘ra aslida salkam 50 tonnadan ortiq og‘irlikdagi qurilish mollari va avto ehtiyot qismlari bo‘lishi lozim edi.
Ammo, ushbu konteynerlar belgilangan tartibda bojxona ko‘rigidan o‘tkazilganda konteynerlardan biriga yo‘l-yuk kuzatuv hujjatlarida va bojxona xodimlarining og‘zaki so‘rovi paytida umuman ma’lum qilinmagan 24 turdagi kiyim-kechaklar ortilgani hamda ularning taxminiy qiymati 2 milliard 230 million so‘mdan oshiqroq ekanligi aniqlandi.
Ikkinchi konteynerda ham tegishli hujjatlarda qayd etilmagan qiymati 203 million so‘mdan ortiq bo‘lgan kiyim-kechaklar va turli qurilish mollari borligi ma’lum bo‘ldi.
Tahlillarga ko‘ra, shu yo‘l bilan qonunbuzarlar 786 million so‘mdan ortiq bojxona to‘lovlarini to‘lashdan qochishga uringan.
Mazkur holat yuzasidan O‘zbekiston Respublikasi Jinoyat kodeksining 182-moddasi (bojxona to‘g‘risidagi qonun hujjatlarini buzish) 2 qismi “a” bandiga muvofiq jinoyat ishi qo‘zg‘atildi.
Unga ko‘ra, juda ko‘p miqdordagi tovarlarni boshqa nom bilan deklaratsiyalab, O‘zbekiston Respublikasining bojxona chegarasidan o‘tkazish eng kam oylik ish haqining uch yuz baravaridan olti yuz baravarigacha miqdorda jarima yoki uch yilgacha axloq tuzatish ishlari yoxud besh yildan sakkiz yilgacha ozodlikdan mahrum qilish bilan jazolanadi.
Izoh (0)