Qozog‘iston Markaziy Osiyo davlatlari rahbarlarining norasmiy uchrashuvini Navro‘z bayrami kunlari o‘tkazishni taklif etdi. Bu haqda Kazakhstan Today xabar bermoqda.
Ostonada bo‘lib o‘tayotgan “Qozog‘istonning modernizatsiya modeli yangi global reallikda” nomli xalqaro parlament anjumanida mamlakat tashqi ishlar vaziri Qayrat Abdraxmanov Qozog‘iston qo‘shni davlatlar bilan Markaziy Osiyo yetakchilari norasmiy maslahalashuvlari haqidagi tashabbusni amalga oshirish ustida ishlashini bildirdi.
“Yangilanish fasli bo‘lgan Navro‘z bayrami Markaziy Osiyo yetakchilarining uzoq yillar mobaynidagi ilk uchrashuvini o‘tkazish uchun ramziy fon bo‘lib xizmat qilgan bo‘lardi”, — dedi vazir.
Eslatib o‘tamiz, Samarqand shahrida BMT shafeligida o‘tkazilgan «Markaziy Osiyo: yagona tarix va umumiy kelajak, barqaror rivojlanish va taraqqiyot yo‘lidagi hamkorlik» mavzusida xalqaro konferensiyada O‘zbekiston Prezidenti Shavkat Mirziyoyev Markaziy Osiyo davlat rahbarlarining o‘zaro uchrashuvlarni muntazam tashkil qilish tashabbusini ilgari surgandi.
Izoh (0)