Gruziyada olti nafar o‘quvchi harakatlanayotgan mikroavtobusdan tushib qoldi

Gruziyaning Keds munitsipalitetidagi Batumi — Axalsix avtotrassasida harakatlanayotgan mikroavtobusdan olti nafar bola tushib qoldi. Bu haqda “Interfaks” xabar bermoqda.

Mikroavtobusda Batumidagi maktablardan birining o‘quvchilari, jumladan, o‘qituvchi va ota-onalari bilan ekskursiyadan qaytayotgan oltinchi sinf o‘quvchilari bo‘lgan. Harakat davomida mikroavtobus eshigi ochilib ketgan va olti nafar bola yo‘lga qulagan.

Dastlabki ma’lumotlarga ko‘ra, o‘quvchilar o‘ynashib, tasodifan eshikni ochib yuborgan, qulash chog‘ida esa bir-birini tortib ketgan.

Batumi bolalar kasalxonasi shifokorlari besh nafar bola jiddiy jarohat olmagani va holati barqarorligi, bir bola esa boshidan jarohatlanganini bildirdi.