Rossiyada 26-oktyabr, payshanba kuni mamlakat strategik yadro kuchlarini boshqarish bo‘yicha mashg‘ulot o‘tkazildi. Bu haqda Rossiya mudofaa vazirligi ma’lum qildi, deya xabar beradi “Gazeta.ru”.
“Mashg‘ulot davomida Strategik raketa qo‘shinlari, Shimoliy va Tinch okeani flotlari atom raketa suvosti kemalari ekipajlari, Havo-koinot kuchlari raketa tashuvchilari va bombardimonchilarining amaliy harakatlari mashq qilindi”, — deyiladi vazirlik xabarida.
Mashg‘ulotga uzoq masofa aviatsiyasining Tu-160, Tu-95MS va Tu-22M3 samolyotlari ham jalb etildi. Ular Kamchatka, Komi va Qozog‘istonda joylashgan quruqlikdagi nishonlarni mo‘ljalga oldi.
Shuningdek, 4 ta ballistik raketa uchirildi. “Plesetsk” kosmodromidan parvoz qilgan “Topol” qit’alararo ballistik raketasi Kamchatkadagi “Kura” poligoniga borib yetdi. Yana 3 ballistik raketa suvosti kemalaridan uchirildi.
Izoh (0)