FQB murakkab shifrlash tizimlari sabab smartfonlarni buzib kira olmayotganidan nolidi

AQSh federal qidiruv byurosi joriy yilda ma’lumotlar mazmuni bilan qiziqqan smartfonlarning yarmidan ko‘piga buzib kirolmagan. Bu haqda byuro direktori Kristofer Reyning so‘zlariga asoslanib, “Gazeta.ru” xabar bermoqda.

Reyning so‘zlariga ko‘ra, federal agentlar 6,9 mingta smartfonga buzib kirolmagan.

“Bu katta muammo. Bu narkotiklar, odam savdosi, terrorizm, bolalar ustidan zo‘ravonlik, tashkiliy jinoyatchilik kabi turli yo‘nalishlar bo‘yicha tekshirishlar o‘tkazishga ta’sir ko‘rsatadi”, — deydi u.

FQB direktori eng jiddiy muammolardan biri sifatida gadjet ishlab chiqaruvchi kompaniyalar bilan shifrlash yuzasidan kelib chiqadigan kelishmovchilikni aytib o‘tdi.

Uning ta’kidlashicha, sudlar gumonlanuvchilarning qurilmalaridagi himoyalangan ma’lumotlarni o‘rganishga byuroning huquqi borligini tasdiqlagan, biroq ishlab chiqaruvchi—kompaniyalar huquq-tartibot organlari bilan hamkorlik qilishni istamaydi.

Rey agarda tomonlar mazkur masala bo‘yicha o‘zaro bir qarorga kela olmasa, kelgusida vaziyat yanada og‘irlashishi mumkinligini qo‘shimcha qildi.