Davlat raqobat qo‘mitasi tomonidan o‘tkazilgan xatlovlar Chinoz tumani hududida avval xususiylashtirilgan hamda bugungi kunda bo‘sh turgan 41 ta obyektlar mavjudligini ko‘rsatmoqda, deb yozadi Davlat raqobat qo‘mitasi Axborot xizmati.
Mazkur obyektlarning jami qurilish maydoni 52,3 ming kv.m.ni, egallagan yer maydonlari 48,2 gektarni tashkil etadi. Ushbu obyektlar qatoriga sobiq “Keramzit shag‘al korxonasi”,“Mebel fabrikasi” va “Chinoz bosh pillaxonasi” kabi yirik ishlab chiqarish majmualari ham kiritilgan.
O‘zbekiston Respublikasi Prezidentining 2017-yil 23-fevralda qabul qilingan PQ-2796-sonli qaroriga muvofiq, joylarda Qoraqalpog‘iston Respublikasi Vazirlar Kengashi Raisining, viloyatlar hamda Toshkent shahri hokimlarining birinchi o‘rinbosarlari boshchiligida Idoralararo komissiyalar tuzilgan.
Ushbu komissiyalarga avval xususiylashtirilgan korxona va obyektlarning qaytadan to‘la quvvatda va samarali ishlashini ta’minlash vazifasi yuklatilib, tadbirkorlarning investitsiya loyihalarini amalga oshirishida amaliy yordam berish bo‘yicha ko‘plab vakolatlar berilgan.
Davlat raqobat qo‘mitasining ma'lum qilishicha, hozirda Chinoz tumanidagi bo‘sh obyektlardan 30 tasi negizida mulkdorlar tomonidan yangi ishlab chiqarish va xizmat ko‘rsatish obyektlarini ishga tushirish bo‘yicha loyihalarni amalga oshirish taklifi berilgan.
Eslatib o‘tamiz, O'zbekiston Respublikasi Prezidentining 2017-yil 23-fevraldagi PQ-2796-sonli qaroriga muvofiq, qurilishi tugallanmagan obyektlar va bo‘sh turgan ishlab chiqarish maydonlaridan samarali foydalanishni ta’minlamagan mulkdorlarga nisbatan soliq idoralari tomonidan ta’sirchan soliq mexanizmlarini qo‘llash belgilangan.
Shuningdek, Prezidentning joriy yil 18-apreldagi farmoniga asosan, Davlat raqobat qo‘mitasiga davlat organlari va boshqa idoralarning faoliyatini muvofiqlashtirish vakolati berilgan bo‘lib, investitsiya loyihalarini amalga oshirish istagida bo‘lgan avval xususiylashtirilgan ob'ektlarning mulkdorlari duch kelgan to‘siq yoki muammolar yuzasidan (8-371) 259-20-23, 259-20-53, 259-21-14 telefon raqamlariga murojaat qilishi mumkin.
Izoh (0)