Moskvaning besh yulduzli mehmonxonalarida bo‘sh joy qolmadi: Saudiya podshohi Rossiyaga keldi

Saudiya Arabistoni podshohi Salmon bin Abdul Aziz as-Saud 4-oktabr kuni Moskvaga keldi — u Rossiyaga tashrif buyurgan Saudiyaning ilk podshohidir. Tashrif 7-oktabr kuniga qadar davom etadi, deya xabar bermoqda TJournal.

Rossiya hukumati mazkur tashrifga alohida tayyorgarlik ko‘rdi. 2—8-oktabr kunlari Moskvada Saudiya Arabistoni madaniyati kunlari bo‘lib o‘tadi: ko‘chalarda ko‘plab billbordlar paydo bo‘lgan. Podshoh qo‘ngan Vnukovo aeroportidan shaharga olib chiquvchi yo‘l bo‘ylab mehmonlarni olqishlovchi reklamalar qo‘yib chiqilgan.

Rossiya rahbariyati saudiyalik monarxning tashrifiini tarixiy, deb atamoqda. U 5-oktabr kuni Moskvada prezident Vladimir Putin bilan, 6-oktabr kuni esa Rossiya bosh vaziri Dmitriy Medvedev bilan uchrashadi. Tashrif munosabati bilan Saudiyaning neft qazib oluvchi eng yirik kompaniyasi ishtirokida investitsiyaviy forum o‘tkaziladi. “Vedomosti” ma’lumotlariga ko‘ra, Arabistonning suveren fondi Moskvadagi ilk pullik yo‘l — Kutuzovskiy shoh ko‘chasini takrorlovchi shosse qurilishini moliyalashtirmoqchi.

Ming kishilik delegatsiya qayerda yashaydi?

“Kalashnikov” konsernining tashqi munosabatlar bo‘yicha direktori Sofiya Ivanova 3-oktabr kuni Facebook’dagi sahifasida Moskvadagi besh yulduzli mehmonxona “butun do‘konlari va restoranlari bilan birga” yopilishini “tasodifan bilib qolgani” haqida yozdi. Uning so‘zlariga ko‘ra, bu holat Saudiya podshohining tashrifi bilan to‘g‘ridan-to‘g‘ri bog‘liq bo‘lib, cheklovlar 7-oktabrda olib tashlanadi.

Keyinroq Ivanova “adashib ketib” Ritz-Carlton mehmonxonasi haqida yozgani, aslida gap Four Seasons haqida borayotganini yozdi. Mazkur mehmonxonalar tarmog‘ining Moskvadagi eng mashhur oteli Qizil maydon, Kreml va Davlat dumasi yonida joylashgan.

Four Seasons tasodifan tanlanmagan: podshoh bu tarmoq mehmonxonalarida bir necha bor, ularning barcha xonalarini band qilgani holda to‘xtagan. OAV ma’lumotlariga ko‘ra, tarmoqda podshohning jiyani shahzoda al-Volidning ulushi bor.

Keyinroq Moskvadagi besh yulduzli mehmonxonalarga talab keskin oshib ketgani haqidagi xabarlarni “RIA Novosti” ham tasdiqladi. Mehmonxonalarning vakillari podshoh delegatsiyasi vakillari Kreml va Qizil maydon atrofidagi, Manejniy maydoni, Lubyanka va Kuznetskiy ko‘prigi yaqinidagi barcha yuqori darajadagi bo‘sh xonalarni band qilayotganini bildirdi. Delegatsiya bir vaqtning o‘zida bir necha mehmonxonada istiqomat qilayotgan bo‘lib, ular orasida Four Seasons, St. Regis va “Natsional” bor.

Agentlik ma’lumotlariga ko‘ra, podshohning tashrifi kunlari Kreml atrofidagi besh yulduzli mehmonxonalardan joy band qilish imkoni yo‘q. Bunday holat kamdan-kam, odatda “katta guruh bo‘lib uyushtirilgan tashriflar” vaqtida kuzatiladi. Four Seasons’dagi eng qimmat va eng katta — maydoni 500 kvadrat metr bo‘lgan xonaning bir kunlik haqi qariyb bir million rubl (17 ming dollar)ga teng.

Mehmonxonalarning ba’zi xonalari podshoh tashrifi uchun alohida tayyorlangan: Ar-Riyoddan gilamlar va xos mebellar keltirilgan (masalan, past yog‘och karavotlar). Tashrif yakunlangach, “Osiyo anjomlar” omborga qo‘yiladi. Boshqa o‘zgarishlar ham bor — menyudan cho‘chqa go‘shtili taomlar vaqtincha chiqarib tashlangan.

Saudiya Arabistoni podshohi delegatsiyasi odatda “og‘ir vazn”da tashrif buyuradi. 2017-yil martida Indoneziyaga uyushtirilgan to‘qqiz kunlik tashrif davomida delegatsiya o‘zi bilan 459 tonna yuk, ikkita Mercedes S600 avtomobili va ikkita elektr lift olib kelgandi. O‘shanda 800 kishilik delegatsiya 27 reys davomida manzilga yetkazilgan.