Facebook’dagi “Potrebitel.uz” sahifasi moderator Liliya Nikolenko ehtiyojmandlarga yordam qo‘lini cho‘zgan toshkentlik tadbirkorga minnatdorlik bildirib, post yozdi.
Uning qayd etishicha, bir kuni Facebook orqali u bilan allaqanday kishi bog‘lanib, bolalar kiyimlari sotiladigan do‘koni borligini, haqiqatda ehtiyojmand bo‘lgan bolalarga do‘konidagi kiyim-kechaklardan xayriya qilmoqchi ekanligini ma’lum qilgan. Shu bilan birga, do‘konning nomi ham, o‘zining ism-sharifi ham oshkor etilmasligini so‘ragan.
“Do‘kon nomini eshitib, biroz hayratga tushdim. Toshkentda ommabop bo‘lgan sifatli va qimmat kiyim-kechaklar sotiladigan brend do‘kon”, — deb yozadi Nikolenko.
Xayriya qilingan buyumlar ko‘ngillilar yordamida Olmaliqdagi 80-sonli ixtisoslashgan maktab-internat, Sirdaryo shahridagi maktab-internat, OIVga chalingan bolalar uchun markaz hamda Toshkentdagi bir nechta kam ta’minlangan oilalarga yetkazib berilgan.
Xayriya qilgan shaxs shundan keyin ham ehtiyojmandlar uchun yana ikki quti kiyim-kechak, kir yuvish kukuni va sovun keltirgan. Endi esa boshpanasiz ikki kishiga qishda muzlab qolmasligi uchun ular yashaydigan joyni banner yoki qurilish materiallari bilan qoplab chiqishga yordam bermoqchi, deyiladi postda.
Liliya Nikolenko noma’lum bo‘lib qolishni istagan hadyachiga “ushbu sayyoradagi ezgulikni ko‘paytirgani” uchun chin dildan, ushbu voqeaga daxldor bo‘lgan barcha kishilar nomidan minnatdorlik bildirdi.
Izoh (0)