O‘zbekiston terma jamoasi fan-klubi yetakchisi Abdurahmon Fozilov ishdan ketdi
10 yil davomida O‘zbekiston terma jamoasi fan-klubini boshqarib kelgan futbol fanati Abdurahmon Fozilov o‘z xohishiga ko‘ra ishdan ketdi. Bu haqda uning o‘zi ma’lumot berdi.
Foto: “Championat.asia”
Bunda Fozilov o‘z o‘rnini yoshlarga bo‘shatish vaqti kelganini tushunib yetganini ma’lum qilgan.
Bundan 10 yil avval Saudiya Arabistoni terma jamoasiga qarshi muhim o‘yindan oldin Rauf Inileyev boshchiligidagi O‘zbekiston terma jamoasini fan-klub tashkil qilib, chiroyli qo‘llab-quvvatlab bera olasizlarmi, deb meni O‘FFga chaqirishgandi. 10 kun tayyorgarlik ko‘rib, 300 kvadrat metrli ulkan bayroq tayyorlangan va fan-klub tuzilgandi.
O‘sha kuni milliy terma jamoamiz kuchli raqib ustidan 3:0 hisobida g‘alaba qozongandi. 10.000 dan ortiq muxlis “MHSK” stadioniga kira olmay, ko‘chada qolib ketgani hamon yodimda...O‘sha kundan buyon xoh uyda, xoh xorijda — Siz azizlar bilan yelkama-yelka turib, bir tan-u bir jon bo‘lib, milliy terma jamoalarimizni qo‘llab-quvvatladik.
Ayniqsa, 2015-yil fevral oyida Toshkentda o‘tgan futzal bo‘yicha Osiyo chempionati... Qorli kunlar-u, jazirama issiqda, yomg‘ir-u sovuqda vatanimizning birinchi raqamli jamoasiga haqiqiy 12-o‘yinchi bo‘ldik. Barchamiz bir bo‘lib, g‘alaba sari otlanganlarimiz va qo‘llab-quvvatlaganingiz uchun barchangizga bosh egib, minnatdorchilik bildiraman. Ha, biz g‘oliblik gashtini ham surdik, mag‘lubiyat alamini ham totib ko‘rdik.
Vatanimiz bitta, milliy termamiz ham xuddi yuragimiz kabi bitta! Rosti terma jamoamizning oxirgi o‘yinlari dilni judayam og‘ritdi, ishoning, futbolchilarimiz borini berdi, chunki hech qaysi futbolchi yarim kuchda o‘ynayman, deb maydonga tushmaydi. Xatoni boshqa joydan izlashimiz darkor.
O‘FFning yangi rahbariyati yeng shimarib ishni qizg‘in boshlab yuborgan. Endi futbol bo‘yicha barcha terma jamolarimiz yaqin vaqt ichida o‘z maqsadlariga erishadi, deb umid qilaman.
Janubiy Koreyaga qarshi o‘yinda sezdimki, men charchabman… Shu yillar davomida kuchim boricha harakat qildim, bilaman, har biringiz, har qanday fan-klubdan qolishmadingiz! Chunki har biringiz shu aziz vatan uchun joningizni berishga tayyorsiz!
Men o‘z ixtiyorim bilan muxlislar klubi rahbarligidan ketish istagini bildiraman. Chunki yoshlarga yo‘l ochish har birimizning burchimizdir. Masalan, “Paxtakor” fan-klubida Javohirbek, “Andijon”da Nodirbek, “Qizilqum”da Shuhratjon, “Qo‘qon”da Ilhomjon va Qahramonjon kabi yetakchilar bor. Sanasak, sanog‘iga yetmaymiz, ularning barchasi terma jamoa fan-klubi rahbarligiga loyiq.
Endi bo‘ldi, ishbilarmonligimni qilib yuraveraman va futbolga befarqman deganim emas. Men oxirgi nafasimgacha, tish tirnog‘im bilan yurt sha’nini himoya qilaman, Alloh bergan umrimning bir qismini oilamga, boshqa qismini futbol va albatta vatan bayrog‘ini yanada baland ko‘tarishga sarflayman. Axir, bejizga 2016-yil, 24-avgust kuni O‘zbekiston birinchi Prezidenti Islom Karimov menga O‘zbekistonda xizmat ko‘rsatgan yoshlar murabbiyi unvonini bermagan. Men bu ishonchni albatta oqlashim kerak!
Baxt va omad siz-u bizni aslo tark etmasin, olg‘a O‘zbekiston! Barchangizga sihat-salomatlik tilab, Abdurahmon Fozilov.
Foto: “Championat.asia”
O‘FF prezidenti ketdi, fan-klub yetakchisi ketdi. Tashkilot vitse-prezidentlari Asqar Tolibjonov va Sardor Rahmatullayev, shuningdek, PFL direktori Farhod Magomedov hozircha jim. Ular faoliyatini davom ettiradimi yoki ishdan ketadimi — aniqlik kiritilmagan. Ularning o‘zi ham bu borada chiqish qilmagan.
Izoh (0)