O‘zbekiston milliy terma jamoasi bosh murabbiyligidan iste’foga chiqarilgan Samvel Babayan o‘zining so‘nggi matbuot anjumanida muxlislardan uzr so‘ramagani aytilgandi. “Interfutbol” nashri bu kemtikni to‘ldirish uchun, Samvel Babayan bilan bog‘landi.
Aytilishicha, Babayan intervyu berish masalasidagi taklifga o‘z odatiga ko‘ra javob bergan va uni keyinroqqa qoldirgan. Shuningdek, dil izhorlarini futbol ishqibozlariga yetkazib qo‘yishni iltimos qilgan.
Avvalambor, muxlislar ishonchini oqlay olmaganim uchun ulardan kechirim so‘ramoqchiman. O‘tgan yillar mobaynida murabbiylar shtabi bilan birga imkoniyatimiz darajasida katta hajmdagi ishlarini amalga oshirishga harakat qildik.Xususan, terma jamoa bir ahil oilaga aylandi. Bizning asosiy maqsadimiz uni JChga olib chiqib, jonajon O‘zbekistonimizda ham futbol o‘ynay olishlarini, bu sport turini yaxshi ko‘rishlarini namoyish etish va shu orqali yurtimiz dovrug‘ini yanada ko‘tarish edi.
Men shu o‘rinda bizga yetarli shart-sharoitlarni yaratib bergan O‘FF prezidenti Mirabror Usmonovga minnatdorchilik bildirmoqchiman. Biz turnirni juda yaxshi boshgandik va guruhdagi ikki turdan so‘ng guruh peshqadamiga aylangandik. Terma jamoadagi ishga boshqacha yondoshuv kerak, uning ixtisosligi boshqacha.
Natija futbolchilar sog‘ligi qanday ekani va ularning o‘z vaqtida terma ixtiyoriga yetib kelishiga bog‘liq. Afsuski, ikki turdan keyin yetakchilarimiz jarohat olishi yoki terma ixtiyoriga optimal formada kelmasligi natijasida tarkibda yuqotishlarga uchradik. Ba’zi o‘yinlarda shaxsan mening xatolarim tufayli ham ochkolar yuqotdik.
Shu bilan birga bizga ko‘plab o‘yinlarda omad yetishmadi. So‘nggi daqiqlarda o‘tkazib yuborilgan gollar faqat yo‘q qo‘yilgan xatolar evaziga emas, balki omad degan narsaga ham bog‘liq bo‘ldi.
Nima bo‘lganda ham mazkur bosqichda ishtirok etgan futbolchilarimizdan iborat jamoa JChda ishtirok etishga loyiq edi. Men ishonmanki, bizning bosh jamoa JCh final bosqichida qatnashadi. Buning uchun bizda iqtidorli futbolchilar juda ko‘p.
Shu o‘rinda muxlislarga ikki yil mobaynida va so‘nggi turgacha qo‘llab-quvatlagani uchun katta rahmat aytaman. Termada ishlash har qanday mutaxassis uchun katta faxr, shu bilan birga u katta javobgarlik va mas’uliyat yuklaydi. Xudo haqi, shaxsan men butun vujudim bilan shu ishga o‘zimni bag‘ishlagandim.
Bizga ezgu maqsad sari, ya’ni, JCh final bosqichi uchun bittagina gol yetishmadi, xolos... Biz mundialga chiqish uchun, muxlislarimizni baxtiyor qilish uchun barcha o‘ylagan ishlarimizni qildik, ammo... Men yana bir karra ulardan uzr so‘rayman va terma jamoamizni keyingi o‘yinlarda g‘alaba qozonib, ularga faqat quvonch va baxt olib kelishini tilab qolaman.
Samvel Babayan, murabbiy
Izoh (0)