AQShda Donald Trampning tvitlar to‘plami sotuvga chiqdi
AQShda prezident Donald Trampning karikaturachi Shennon Uiller illyustratsiyalari tushirilgan tvitlar to‘plami sotuvga chiqdi. Bu haqda “TASS” xabar bermoqda.
“Franklin Ruzveltda radio, Jon Kennedida televideniye bo‘lgandi. Trampda esa Twitter bor. Karikaturachi, Eyzner mukofoti sohibi Shennon Uiller 140 belgidan iborat yozuvlarda fikrini bayon etadigan prezidentni ‘qismlarga’ ajratdi”, — deyiladi to‘plam annotatsiyasida.
To‘plam muallifi Trampning tvitlari AQSh 45-prezidenti fe’l-atvorini anglab yetishga imkon beradi, deb hisoblamoqda.
“Men Trampning 30 mingdan ortiq tvitini o‘qib chiqdim. 10 minginchi tvitdan so‘ng tushlarimda bosinqirashni boshladim. Ortiqcha tafsilotlarga berilishni istamasdim, ammo pudingga bo‘lgan ishtaham butkul yo‘qoldi, Britaniyaning shifokorlar hayoti haqidagi seriallarini ko‘rishni to‘xtatdim”, — deya kinoya qiladi Shennon Uiller.
Qattiq muqovadagi kitob salkam 10 dollardan sotilmoqda, uni Amazon orqali ham buyurtma qilish mumkin.
