Bill Geyts 17 yil ichidagi eng yirik — 4,6 mlrd dollarlik xayriyani amalga oshirdi
Microsoft kompaniyasi asoschisi va dunyoning eng badavlat kishisi Bill Geyts 2000-yildan buyon eng yirik xayriyani amalga oshirdi, deb yozadi “TASS” AQSh qimmatli qog‘ozlar va birjalar komissiyasiga tayanib.
61 yoshli milliarder o‘z kompaniyasining 4,6 milliard dollarlik aksiyalarini 6-iyundayoq xayriya qilgan edi. Ularni qaysi tashkilot qabul qilib olgani ma’lum qilinmayapti.
Bloomberg ta’kidlashicha, filantrop odatda eng katta xayriyalarni o‘zi va rafiqasiga tegishli Bill & Melinda Gates Foundation jamg‘armasiga beradi.
Geyts xayriya faoliyatiga kiritgan eng yirik summa 16 milliard dollar bo‘lgan va u 1999-yilda amalga oshirilgan, bir yil o‘tib esa 5,1 milliard dollar xayriya qilgan. 1994-yildan buyon xayriya uchun ajratgan mablag‘lari esa qariyb 35 milliard dollarni tashkil etadi.
