Android uchun Chrome’da reklamani bloklash funksiyasi paydo bo‘ldi

Android uchun Google Chrome brauzerining yangi sinov versiyasi qo‘shimcha vositalarsiz reklamani bloklab qo‘ya oladi, deb yozadi “Layfxaker”.

Bu funksiya hozircha brauzerning faqat Chrome Canary va Chrome Dev versiyalarida sinov rejimida ishlamoqda. Bu dasturlarni har qanday kishi yuklab olishi mumkin. Reklamani bloklash funksiyasini “Sayt sozlamalari” → “Reklama” bo‘limi orqali yoqish mumkin.

Ammo brauzer faqat “xira” reklamalarni bloklaydi. “Yomon” reklamaning ma’lumotlar bazasi “Yaxshiroq reklama uchun koalitsiya” (Coalition for Better Ads)dan olinadi. Aldovchi reklama, butun ekranni egallaydigan bannerlar, avtomatik tarzda qo‘yiladigan videolar va foydalanuvchilarga xalal beradigan boshqa reklamalar blokka tushadi.

Google “xira” reklamani bloklash funksiyasini 2018-yilda Chrome’ning yakuniy versiyasiga kiritishni rejalashtirmoqda.