Shvetsiyada mahalliy o‘ng ekstremistik tashkilotning Geteborgdagi muhojirlarni qabul qilish markaziga hujum qilganlikda ayblanayotgan ikki a’zosi, go‘yoki, Rossiyaga borib, Ukraina sharqidagi nizo doirasida jangovar tajribaga ega bo‘lgan shaxslar ishtirokidagi “mashg‘ulotlar”da qatnashgan. Bu haqda Buzzfeed Shvetsiya sudidan olgan hujjatlarga tayanib xabar berdi, deb yozadi “Gazeta.ru”.
Nashr ma’lumotlariga ko‘ra, tergov hujumni Shvetsiyaning “Shimoliy Yevropa qarshilik harakati” ekstremistik tashkiloti a’zolari uyushtirgan, deb hisoblaydi.
Shu bilan birga, ta’kidlanishicha, prokuratura uning uch nafar ishtirokchisiga ayblovlar e’lon qilgan, bular — 20 yoshli Anton Tulin, 50 yoshli Jimmi Yoxansson va ushbu tashkilotning Geteborg yacheykasi yetakchisi 23 yoshli Viktor Melin.
Qayd etilishicha, prokuratura ma’lumotlariga ko‘ra, Melin va Tulin Rossiyaga 2016-yil kuzida kelib, u yerda 11 kun bo‘lgan, shu jumladan, “mashg‘ulotlarni o‘tagan”.
Tergov, go‘yoki, ikki gumonlanuvchi aks etgan fotosurat skrinshotiga ega, u “VKontakte”da Sankt-Peterburgdagi allaqanday o‘ng radikal guruhlar mashg‘ulotlari dasturiga bag‘ishlangan sahifaga joylangan.
Shuningdek, xabarlarga ko‘ra, politsiya hujum qilganlardan birining uyidan qurol va portlovchi vosita haqida rus tilida yozilgan ma’lumotlarni musodara qilgan.
Izoh (0)