“Yoshlar” teleradiokanali direktori Ozodbek Nazarbekov telekanal faoliyati bilan bog‘liq ijodiy rejalari, loyihalari haqida ma’lum qildi. Bu haqda shoir Muhammad Ismoil Facebook’dagi sahifasida xabar qoldirdi, deb yozadi Uz24.
Aytilishicha, “Yoshlar” telekanalida bir qancha yangi teleloyihalar tayyorlanmoqda. Ulardan biri “Yoshlar qabulxonasi” ko‘rsatuvi bo‘lib, u Ozodbek Nazarbekov tashabbusidir. Ko‘rsatuvda uning o‘zi boshlovchilik qiladi. Ko‘rsatuv 20-iyul, payshanba kuni kechki dasturlarda ilk efir yuzini ko‘radi.
“Ushbu ko‘rsatuv bugungi kunda oliy o‘quv yurtlariga kirish uchun hujjat topshirgan abituriyentlarga, ularning oldida turgan muammolarga, to‘siqlarga, qiyinchiliklarga bog‘ishlanadi. Viloyatlardan kelgan abituriyentlar qayerga joylashdi? Imtihonlarga tayyorgarlik ko‘rish uchun qanday shart-sharoitlar yaratildi? Ularga qanday yengilliklar yaratishimiz kerak? Ko‘rsatuv tayyorlash jarayonida juda ko‘p abituriyentlar, institut xodimlari, oliy ta’lim rahbarlari bilan bog‘landik, vazir o‘rinbosari bir qancha tanqidiy fikrlarimizga javob berdi”, — dedi telekanal rahbari Ozodbek Nazarbekov.
Shuningdek, xabar berilishicha, telekanalda respublikadagi mavjud partiyalar faoliyati, deputatlar, kadrlar tayyorlash jarayoni, kollej va maktab kabi dolzarb mavzularga bag‘ishlangan muhokama va munozara shaklidagi ko‘rsatuvlar ham tayyorlanmoqda. O‘zbekistonning taniqli shaxslari, jumladan, Islom Karimov, Sharof Rashidovlarning hayoti va faoliyati haqida hikoya qiluvchi turkum filmlar ham suratga olinmoqda. Qolaversa, “Kak stat millionerom?” (“Qanday qilib millioner bo‘lish mumkin?”), “Golos” (“Ovoz”) kabi mashhur ko‘rsatuvlarning xorijdagi mualliflari bilan shu ko‘rsatuvlarning o‘zbekcha variantini tayyorlash borasida shartnomalar imzolanmoqda.
Izoh (0)