Mustaqil davlatlar hamdo‘stligi Ijroiya qo‘mitasi raisi — Ijrochi kotibi Sergey Lebedev “Jahon” axborot agentligining muxbiri bilan Moskvada uchrashib O‘zbekiston Respublikasining birinchi Prezidenti Islom Karimov bilan bog‘liq xotiralarini yodga oldi.
Men O‘zbekistonda tug‘ilganman va o‘z Vatanimni sevaman. U yerda mening yoshligim, maktab davrlarim o‘tgan. 2000-yilda meni Rossiya tashqi razvedkasining direktori etib tayinlashganida birinchi safarim, albatta, Toshkentga bo‘lgan.Tashrif chog‘ida men O‘zbekiston Prezidenti Islom Karimov tomonidan kutib olinish baxtiga musharraf bo‘ldim. Prezident juda iliq kutib olgani meni hayratlantirdi. Mamlakat rahbari mening bolaligim o‘tgan Jizzax haqida qiziqish bilan savollar berdi. Men esa yuragimdagi ulkan g‘urur bilan pasportimdagi “tug‘ilgan joyi” degan bandga “Samarqand viloyati” deb yozilganini ma’lum qildim (1948-yilda Jizzax Samarqand viloyati tarkibida bo‘lgan).
Keyinchalik Islom Karimov O‘zbekistonga bo‘lgan muhabbatimni saqlab qolganim uchun meni qadrlashini ko‘p bora aytgan edi.
Ushbu taniqli siyosatchi bilan MDH, ShHT sammitlarida yiliga 2—3 marta ko‘rishishga muvaffaq bo‘lardim. Ta’kidlashim kerakki, har bir uchrashuv yodimda qolgan. Islom Karimovning iliq, do‘stona munosabatini doim sezib turganman. Uni katta hurmat bilan eslayman va mening nomimga yo‘llagan samimiy so‘zlari hamda tilaklari uchun minnatdorman.
2016-yil 24-iyun kuni ShHTning Toshkentdagi sammiti doirasida bo‘lib o‘tgan uchrashuv xotiramda o‘chmas iz qoldirgan. Tadbir davomida ShHTga a’zo davlatlarning yetakchilari uchun ajoyib konsert tashkillashtirilgan edi. Men Prezidentdan yetti metr narida o‘tirar edim. Konsertning o‘rtasida “Lazgi” an’anaviy kuyi yangraganida u o‘rnidan turdi-da raqsga tusha boshladi. Uning ko‘zlaridagi quvonchni mamnuniyat bilan tomosha qilish mumkin edi.
Islom Karimov o‘z e’tiqodi va harkatlarida qat’iy edi. U xalqaro maydonda, avvalo MDHda tan olingan rahbar edi. Mamlakat rahbarlari kichik doirada yig‘ilishlar o‘tkazganida, u “oqsoqol” vazifasini bajarardi.
Men Islom Karimovning so‘zlarini, maslahatlarini va iliq munosabatlarini tez-tez yodga olib turaman. O‘ylaymanki, u bilan birga ishlash baxtiga muyassar bo‘lgan minglab odamlarda ham shu kabi xotiralar mavjud.
Islom Karimovning xotirasi abadiydir!
Sergey Lebedev, Mustaqil davlatlar hamdo‘stligi Ijroiya qo‘mitasi raisi — Ijrochi kotib
Izoh (0)