Kecha Argentina terma jamoasi va “Barselona” hujumchisi Lionel Messi bolalikdagi sevgilisi Antonella Rokutssoga uylandi.
Marosim katta qiziqishga sabab bo‘ldi va jahonning ko‘plab nashrlari o‘z jurnalistlarini to‘y bo‘lib o‘tadigan Rosario shahriga yubordi.
“Oltin to‘p”ning besh karra sohibi hayotidagi eng yorqin voqea uchun xarajatlardan qochmadi va marosimni City Center Rosario’da o‘tkazishga qaror qildi, deb yozdi “Championat.asia” nashri Daily Mail saytiga asoslanib. Mehmonlar bunda kazinodan foydalanishi, majmua ichidagi 188 nomerga ega 5 yulduzli Pullman mehmonxonasida qolishi mumkin edi. Shu bilan birga binoda bouling, tennis kortlari, yopiq va ochiq basseyn hamda ko‘plab bar va restoranlar mehmonlar uchun xizmat qildi.
To‘yga “Barselona” to‘liq tarkib bilan taklif qilindi. Ammo rahbariyat bundan mustasno. Xerard Pike, Shakira va Neymar juma kuni Rosario shahriga yetib keldi. Xavi, Sesk Fabregas, Serxio Buskets, Xordi Alba, Samuel Eto’O, Karles Puyol va Luis Suares o‘z ayollari bilan Argentinaga 29-iyun kuni uchib kelgandi.
29 yoshli Antonella Rokutsso to‘yda Barselonadan tashrif buyurgan ispaniyalik dizayner Roza Klara yaratgan libosni kiydi. Ushbu dizayner aktrisalar Yeva Longoriya va Sofiya Vergara, shuningdek, Ispaniya qirolichasi uchun maxsus liboslar tayyorlab bergani bilan tanilgan.
Serxio Agueroning xotini Karina to‘ydagi ilk qo‘shiqni kuylab berdi. Urugvay guruhlari Rombai va Marama marosimni davom ettirdi. Pikening xotini Shakira to‘yda o‘zining qo‘shiqlarini kuylashi kerak edi.
155 nafar jurnalist to‘yni yoritish uchun akkreditatsiyadan o‘tkazildi, biroq ular mehmonlar bilan muloqot qila olmas, stol atrofida jam bo‘lolmasdi. Messi bilan avvaldan ishlab kelgan isroillik mutaxassislar to‘y xavfsizligi uchun javobgar bo‘ldi va kamida 300 kishilik guruh bunda mehnat qildi.
Izoh (0)