O‘zbek Milliy akademik drama teatrida 27-iyun — Matbuot va ommaviy axborot vositalari xodimlari kuni munosabati bilan tantanali tadbir tashkil etildi. Bu haqda O‘zA xabar bermoqda.
Tadbirga Oliy Majlis Senati a’zolari, Qonunchilik palatasi deputatlari, vazirlik va idoralar, jamoat tashkilotlari vakillari, faxriy jurnalistlar, noshirlar, matbaachilar, oliy o‘quv yurtlarining jurnalistika fakultetlari professor-o‘qituvchilari va talabalari taklif etildi.
O‘zbekiston Prezidenti Shavkat Mirziyoyevning OAV xodimlariga bayram tabrigini Prezidentning davlat maslahatchisi X. Sultonov o‘qib eshittirdi.
O‘zbekiston Jurnalistlari ijodiy uyushmasi raisi S. Hakimov, Jismoniy tarbiya va sport davlat qo‘mitasi raisi R. Qurbonov, O‘zbekiston davlat jahon tillari universiteti xalqaro jurnalistika fakulteti dekani A. Matyoqubov va boshqalar tabdirda chiqish qildi.
Tadbirda O‘zbekiston Jurnalistlari ijodiy uyushmasi va boshqa tashkilotlar bilan hamkorlikda tashkil etilgan “Yilning eng faol jurnalisti” ijodiy tanlovi g‘oliblariga diplom va sovg‘alar topshirildi. Jismoniy tarbiya va sport davlat qo‘mitasi tomonidan ta’sis etilgan “Eng faol sport jurnalisti” respublika tanlovi g‘olib va sovrindorlari ham taqdirlandi.
Tadbirda O‘zbek Milliy akademik drama teatrining “Mirzo Ulug‘bek” spektakli namoyish etildi.
Shu kuni poytaxtdagi G‘afur G‘ulom nomidagi madaniyat va istirohat bog‘ida OAV xodimlari va ularning farzandlari uchun sayil bo‘lib o‘tdi. Ijodiy kechalar, kitob savdosi, sport musobaqalari tashkil qilindi, musiqiy dasturlar namoyish etildi. Barcha attraksionlar kichkintoylarga bepul xizmat ko‘rsatdi.
Izoh (0)