Vazirlar Mahkamasi qaroriga muvofiq, Kamol Abdulloyev Yong‘oq ishlab chiqaruvchilar va eksport qiluvchilar uyushmasi raisi lavozimiga tasdiqlandi. Bu haqda hukumat portalida ma’lum qilindi.
Uyushma O‘zbekiston Prezidenti Shavkat Mirziyoyevning shu yil 1-iyundagi qarori bilan tashkil etildi.
Yong‘oqning serhosil zamonaviy plantatsiyalarini yaratish, hududlarda yong‘oq ishlab chiqarish hajmini ko‘paytirish choralarini ko‘rish, yong‘oqning serhosil nihollarini laboratoriya sharoitlarida yetishtirishni tashkil etish, innovatsiyaviy texnologiyalarni yong‘oq yetishtirish jarayoniga joriy etish, xorijiy investitsiyalarni jalb qilish uyushmaning asosiy vazifalari va faoliyat yo‘nalishlari etib belgilangan.
Qarorgohi Samarqand shahrida bo‘lgan Yong‘oq ishlab chiqaruvchilar va eksport qiluvchilar uyushmasiga Sam antep gilam (SAG), SAG agro, “Sag agro MTP” MChJ, Yong‘oqchilik ilmiy-tadqiqot markazi, Yong‘oq logistika markazi, Jizzax, Qashqadaryo, Surxondaryo, Namangan va Toshkent viloyatlari hududiy “Yong‘oqagro” MChJlari ta’sischi bo‘ldi.
Kamol Abdulloyev SAG rahbari hisoblanadi.
Izoh (0)