BMT bosh kotibi Antoniu Guterrish 10-iyun kuni Qoraqalpog‘istonga tashrif buyurdi. Bu haqda BMTning O‘zbekistondagi vakolatxonasi matbuot xizmati xabar bermoqda.
Qoraqalpog‘iston poytaxti Nukus shahriga tashrif davomida BMT rahbariga Orol dengizi muammosi haqida qisqacha taqdimot o‘tkazilgan. Ijtimoiy tarmoqlarda e’lon qilingan suratlarda taqdimot “Ekoharakat” rahbari Boriy Alixonov tomonidan o‘tkazilganini ko‘rish mumkin.
BMT bosh kotibi vertolyotda Nukusdan Mo‘ynoqqa jo‘nab ketgan, u Orol dengizining qurigan o‘rni va hozirda mavjud qismini havodan turib tomosha qilgan.
“Antoniu Guterrish Mo‘ynoqda Orol dengizining ‘kemalar qabristoni’ni borib ko‘rdi, mahalliy aholi, oqsoqollar bilan muloqotda bo‘ldi”, — deyiladi BMTning O‘zbekistondagi vakolatxonasi matbuot xizmati tomonidan tarqatilgan axborotda.
Izoh (0)