Toshkentdagi Jahon iqtisodiyoti va diplomatiya universiteti (JIDU)da 27-may kuni O‘zbekiston Tashqi ishlar vazirligi bilan hamkorlikda ilk bor “ShHT Modeli” Talabalar anjumani o‘tkazildi. Bu haqda universitet vakillari “Daryo”ga ma’lum qildi.
Rossiya, Qozog‘iston, Xitoy, Tojikiston kabi ShHTga a’zo davlatlarning O‘zbekistondagi elchilari ishtirokidagi o‘ziga xos simulyator konferensiyani model klubi bosh kotibi, JIDU talabasi Davlat Umarov ochib berdi.
Shundan so‘ng so‘zga chiqqan universitet rektori Abdumalik Jumanov hamda elchilar tabrik nutqlarida bunday tadbirlar va klublarning faoliyati sohadagi yosh mutaxassislarni har tomonlama toblab borishi hamda kelajakdagi yirik loyihalar uchun o‘ta ahamiyatli ekanligiga e’tibor qaratdi.
Toshkentdagi oliy ta’lim muassasalarining 50 dan ziyod ilg‘or yoshlari “ShHT Davlat rahbarlari kengashining 18 delegatsiyasi” sifatida yalpi muhokamalar, davra suhbati, ilmiy maqolalar tanlovida qatnashish imkoniyatiga ega bo‘ldi.
Universitetdagi “ShHT modeli” klubi asoschisi Davlat Umarov ShHTning 15 yillik yubileyini nishonlash doirasida o‘tkazilgan “Shanxay hamkorlik tashkilotiga 15 yil: Ibtido. Taraqqiyot. Istiqbollar” mavzusida eng yaxshi ilmiy maqola tanlovining 2016-yildagi g‘olibi sanaladi.
Izoh (0)